पूर्वप्रधानमन्त्री तथा नेकपा एकीकृत समाजवादी पार्टीका अध्यक्ष माधवकुमार नेपाललाई विशेष अदालतले ३५ लाख धरौटीमा रिहा गर्दै तारेखका लागि साउन १३ गते बोलाएको छ ।

पतञ्जली योगपिठ तथा आयुर्वेद कम्पनीसँग सम्बन्धित जग्गा हिनामिना प्रकरणमा बुधबार भएको ४ घण्टा लामो थुनछेक बहसपछि विशेष अदालतका सदस्यहरू तेजनारायण सिंह राई, रामबहादुर थापा र विदुर कोइरालाको इजलासले बुधबार उनलाई धरौटीमा छाड्न आदेश दिएको थियो ।

गत जेठ २२ गते अख्तियार दुरुपयोग अनुसन्धान आयोगले पूर्वप्रधानमन्त्री नेपालसहित ९३ जनालाई विपक्षी बनाउँदै हदबन्दीभन्दा बढी जग्गा कम्पनीका नाममा बिक्री वितरण गर्न दिई भ्रष्टाचार गरेको अभियोगमा मुद्दा दायर गरेको थियो ।

भ्रष्टाचार मुद्दा दायर भएपछि पूर्वप्रधानमन्त्री नेपाल बुधबार आफैँ अदालतमा उपस्थित भएका थिए ।
पतञ्जली जग्गा प्रकरणमा अख्तियारले मुद्वा दायर गरेका पूर्वप्रधानमन्त्री नेपालको पक्षमा बहस गर्न एक सय भन्दा बढी वकिलले नाम टिपाएका थिए ।

पूर्वप्रधानमन्त्री नेपाल विशेष अदालतमा उपस्थित भएपछि अपराह्नदेखि उनीसँग बयान लिइएको थियो । त्यसपछि दुवै पक्षका वकिलहरूले थुनछेक बहस गरेका विशेष अदालतका सूचना अधिकारी यज्ञराज रेग्मीले जानकारी दिए । उनका अनुसार न्यायाधीशहरू तेजनारायण सिंह, रामबहादुर थापा र विदुर कोइरालाको इजलासमा नेपालका तर्फबाट पाँच र सरकारी पक्षबाट पाँच जना वकिलले बहस गरेका थिए ।

अदालतका सूचना अधिकारी रेग्मीले बहसका लागि माधव नेपालको पक्षबाट मात्रै एक सय जनाभन्दा बढीले वकालतनामा गरेको बताएका थिए ।

माधव नेपालको पक्षबाट वरिष्ठ अधिवक्ताहरू शम्भु थापा, गोबिन्द बन्दी, सुशील पन्त लगायतले बहस गरेका थिए ।

पतन्जली जग्गा प्रकरणमा पुर्वप्रधानमन्त्री नेपालसहितमाथि ९३ जना विरुद्ध मुद्दा दायर भएको छ ।

माधवकाे पक्षमा बहस गर्न सय बढी वकिलले टिपाए नाम