काठमाडौं । नेकपा एमालेको बागमती प्रदेश अध्यक्षमा रामेछापका कैलाश ढुंगेल विजयी भएका छन् ।

शुक्रबार भएको निर्वाचनमा अर्का प्रत्यासी मकवानपुरका कृष्णप्रसाद दाहाललाई २५७ मतले पछि पार्दै ढुंगेल अध्यक्ष पदमा विजयी भएका हुन् । ढुङ्गेल ६९६ मत पाएर विजयी हुँदा दाहालले ४३९ मत पाएका छन् ।

ढुङ्गेललाई एमालेका केन्द्रीय अध्यक्ष केपी शर्मा ओली र नेता महेश बस्नेतसहितको समर्थन थियो ।

उपाध्यक्षमा ढुंगेल प्यानलका दावादोर्जे लामाले जित निकालेका छन्। ।

यसैगरी सचिवमा भने दाहाल प्यानलका नवराज सिलवाल एक मतले विजयी भएका छन् । सिलवाल ५६८ मतले विजयी हुँदा अर्का प्रत्यासी हस्त पण्डितले ५६७ मत पाएका छन् ।

खुला उपसचिवमा ढुंगेल प्यानलबाट प्रेमकुमार महर्जन विजयी भएका छन्। महिला उपसचिवमा दाहाल प्यानलकी भक्तकुमारी लामा विजयी भएकी छन्।

सहमतिमा नेतृत्व चयन गर्ने प्रयास असफल भएपछि विद्युतीय मेसिनमार्फत् पार्टी कार्यालय च्यासलमा आज मतदान भएको थियो । मतदानमा ११३५ मत खसेको थियो ।