जिल्ला कारागार, सिराहाका अधिकांश कैदीबन्दीमा कोरोना भाइरस कोभिड–१९०को संक्रमण देखिएको छ । कारागारमा रहेका ७९७ कैदीबन्दी र दुई आश्रित बालिकामध्ये ५ सय १४ जनामा संक्रमण पुष्टि भएको हो ।

हालसम्म ७ जना संक्रमणमुक्त भएका छन् । अधिकांशलाई २६ साउनमा कोरोना संक्रमण पुष्टि भएको कारागारकी निमित्त जेलर बबिता महतोले जानकारी दिएकी छीन् ।
अधिकांश संक्रमित भएपछि कारागारलाई नै आइसोलेसन बनाइएको छ भने संक्रमण नदेखिएका व्यक्तिलाई राख्नका लागि वैकल्पिक स्थानको तयारी भइरहेको छ ।

सिरहा जेलका ५९ जनामा कोरोना संक्रमण, स्थिति भयावह हुने खतरा

उनका अनुसार संक्रमणको मुख्य कारण क्षमताभन्दा बढी कैदीबन्दी देखिएको छ ।
२५ साउनमा चोरी, जबरजस्तीकरणी र लागूऔषध सम्बन्धी कसूरका चार जना आरोपीलाई पुर्पक्षका लागि थुनामा राख्न जिल्ला अदालत, सिराहाले आदेश दिएको थियो ।

निमित्त जेलर महतोका अनुसार आरोपीहरुको पिसीआर परीक्षणका लागि स्वाब संकलन भए पनि नतिजा आइसकेको थिएन । त्यसैले कारागारभित्रै निर्मित क्वारेन्टिनमा राखिएको थियो । त्यहाँ राखिएको भोलिपल्ट उनीहरुमा संक्रमण पुष्टि भएपछि केही दिनमा सम्पर्कमा गएका अन्य व्यक्तिको पनि परीक्षण गरियो । त्यसक्रममा थप तीन जनामा संक्रमण पुष्टि भएको महताको भनाइ छ ।

उनीहरुसँग सम्पर्कमा रहेका थपमा पनि कोरोना पुष्टि भयो । परीक्षण गर्दै जाँदा अधिकांश कैदीबन्दी संक्रमित भएको पाइएको महतो बताउँछिन् । ‘क्वारेन्टिनमा रहेका वेला खाना ल्याउने, सफा गर्ने व्यक्तिबाट पनि अन्यमा सरेको हुनसक्छ’, उनी थप्छिन् ।

जिल्ला प्रशासन कार्यालय, सिराहाले भने क्षमताभन्दा बढी कैदीबन्दी भएकाले पनि छिटो संक्रमण फैलिएको हुनसक्ने जनाएको छ । सिराहा कारागारमा डेढ सयभन्दा बढी कैदीबन्दी राख्न समस्या छ । त्यसैले क्षमताभन्दा बढी कैदीबन्दी राखिएकै कारण संक्रमण फैलिएको हुनसक्ने प्रमुख जिल्ला अधिकारी प्रदीप कँडेलको आशंका छ ।

कारागारको दुराबस्थाबारे जिप्रकाले गृह मन्त्रालय र कारागार व्यवस्थापन विभाग, काठमाडौंलाई पनि जानकारी गराइसकेको छ । तर व्यवस्थापनबारे कुनै निर्णय भएको छैन ।