काठमाडौं , २६ चैत ।

नेपालकै सबैभन्दा बढी सिक्वेल बनाइएको चलचित्र ‘नाइँ नभन्नु ल’को चौथो श्रृंखला ‘नाइँ नभन्नु ल–४’ आज शुक्रबारदेखि देशभर एकसाथ प्रदर्शनमा आएको छ ।

परिवार तथा प्रेमसम्बन्धमा आधारित हुने ‘नाइँ नभन्नु ल’ का श्रृंखलाहरूको विषयवस्तुलाई यो शृंखलामा पनि निरन्तरता दिइएको छ । ‘नाइँ नभन्नु ल–२’ बाट दर्शकहरूको मनमा बसेका बालकलाकार अनुभव रेग्मी, ‘नाइँ नभन्नु ल–२ र ३’मा देखिएका प्रियंका कार्की र सरोज खनाल यो श्रृंखलामा पनि दोहोरिएका छन् भने बाँकी सबै कलाकार नयाँ छन् । विशेष गरी म्युजिक भिडियोबाट चर्चामा आएका पल शाह र वर्षा राउतलाई यो चलचित्रमा नयाँ अनुहार आँचल शर्माका साथ देख्न पाइन्छ ।

पल शाहको वर्षा र आँचलसँगको त्रिकोणात्मक प्रेम तथा अनुभवकी आमा भएकी नायिका प्रियंका कार्कीसँगको उनको सम्बन्धजस्ता विषयलाई निर्देशक आचार्यले यो चलचित्रमा केलाएर प्रस्तुत गरेका छन् । चलचित्र ‘नाइँ नभन्नु ल–४’ मा पुरुषोत्तम प्रधानको छायांकन, सामीप्यराज तिमिल्सिना तथा विकास आचार्यको लेखन, अर्जुन जिसीको सम्पादन, कविराज गहतरातको नृत्य तथा हिमाल केसीको द्वन्द्व हेर्न पाइन्छ ।

निर्देशक : विकास आचार्य
संगीत : वसन्त सापकोटा
कलाकार : सरोज खनाल, प्रियंका कार्की, अनुभव रेग्मी, पल शाह, वर्षा राउत, आँचल शर्मा, शिशिर भण्डारी आदि ।