बिहीबार दिउँसैदेखि निरन्तर परिरहेको अविरल वर्षाका कारण काठमाडौँ आवतजावत गर्ने सबै मुख्य प्रवेश राजमार्ग पहिरोले अवरुद्ध भएका छन्।

वर्षाको कारण पृथ्वी राजमार्ग, मुग्लिङ नारायढ सडक खण्ड, नाैविसे हेटौंडा जाेड्ने कान्ति लोकपथ र काठमाडौबाट सिन्धुली हुँदै पुर्वी नेपाल जाेड्ने बीपी राजमार्गमा आवतजावत ठप्प बनेको हो।

धादिङको कृष्णभिरसहित आधा दर्जनभन्दा धेरै स्थानमा पहिरो खसेको प्रहरीले जनाएको छ।

कृष्णभिरसहित सात ठाउँमा गएराति ढुंगासहितको पहिरो खसेकाले राजमार्ग पूर्णरुपमा अवरुद्ध भएको जिल्ला प्रहरी कार्यालय धादिङले जानकारी दिएको छ।

बिहीबार साँझदेखि रातभर आवतजावतमा रोक लगाइएको पृथ्वीराजमार्गमा शुक्रबार बिहान ५ बजेदेखि गाडी सञ्चालन गर्न दिने तयारी स्थानीय प्रशासनको थियो।

तर, अब यो राजमार्ग अनिश्चित कालको लागि बन्द भएको प्रहरीले जनाएको छ।

प्रहरीकाअनुसार पहिरो पन्छाउने प्रयास भैरहेपनि निरन्तरको वर्षाका कारण समस्या भएको छ।

भदौ १४ गते त्रिशूली नदीको काटानको कारण कृष्णभिर क्षेत्रको सडक भासिएपछि दुई साता लगाएर डाइभर्सन बनाएर यातायात सन्चालन गरिएको थियो।

सोही डाइभर्सनसहितका ठाउँमा पहिरो झरेको हो।