वैदेशिक रोजगारमा ज्यान गुमाएका तथा अंगभंग भएकाहरुको सन्तानलाई वैदेशिक रोजगार बोर्डले शिक्षाकालागि छात्रवृत्ति दिइरहेको छ।

बोर्डले ०७१ सालदेखि वैदेशिक रोजगारमा ज्यान गुमाएका र अंगभंग भएका अभिभावकका सन्तानलाई विद्यालय शिक्षा पुरा गराउने उद्देश्यले छात्रवृत्ति उपलब्ध गराउने लक्ष्य राखेको भए पनि सूचना र प्रचार प्रसारको अभावमा लक्षित वर्गले लाभ उठाउन सकेका छैनन्।

श्रम मन्त्रालयको वैदेशिक रोजगार नियमावली २०६४ मा वैदेशिक रोजगार छात्रवृत्ति सहयोग कार्यक्रम रहे पनि यसको कार्यान्वयन भने वैदेशिक रोजगार छात्रवृत्ति संचालन कार्यविधि ०७१ कार्यान्वयनमा आएपछि मात्र भएको बोर्डले जनाएको छ।

बोर्डका कर्मचारी आशिष कुमार भण्डारीका अनुसार चालु शैक्षिक सत्रमा ३ करोडको छात्रवृत्ति उपलब्ध गराउने बोर्डको लक्ष्य रहे पनि त्यस अनुसारको आवेदन प्राप्त हुन सकेको छैन।

यो वर्ष ५४ जिल्लाको २ हजार ४ सय २५ ले मात्र छात्रवृत्ति कोलागि आवेदन दिएका छन्। जसमध्ये ३३ जिल्लामा बोर्डले एक करोड ४५ लाख रकम पठाइसकेको उनले जनाए।

२१ जिल्लामा रकम पठाउने काम सुरु भएको छ। बोर्डका अनुसार नर्सरीदेखि कक्षा ८ सम्मका विद्यार्थीलाई वर्षेनी ८ हजार र कक्षा ९ देखि १२ सम्मका विद्यार्थीलाई वर्षेनी १२ हजार रकम उपलब्ध गराइन्छ।

०७१ देखि जेठ समन्तभित्र हालसम्म ११ हजार ७ सय २२ विद्यार्थीले मात्र छात्रवृत्तिबाट लाभ उठाउन सकेको भण्डारीले जनाए।

‘वैदेशिक रोजगारमा ज्यान गुमाएका र अंगभंग भएका सन्तानलाई विद्यालय शिक्षा पुरा गराउने बोर्डको लक्ष्य हो। यो छात्रवृत्ति सरकारी र निजी जुनसुकै विद्यालयमा अध्ययनरत विद्यार्थीले पाउँछ ,’ भण्डारीले नागरिकसँग भने ‘सूचना र प्रचारप्रसारको अभावकै कारण लक्षित वर्गले लाभ उठाउन नसकेको महसुस भएको छ।’ उनले थपे ‘चालु आर्थिक वर्षमा ३ करोड रकम छात्रवृत्तिकोलागि छुटाएको छ। जसमध्ये डेढ करोड रकम बाँकी नै छ। हामीलाई ३ हजार ५ सय सम्म आवेदन आउने आशा थियो।’

शिक्षा विकास तथा समन्वय इकाई काठमाण्डौंका प्रमुख नन्दलाल पौडेलले काठमाडौं जिल्लाका ११ वटा नगरपालिकाका विद्यालयहरुबाट कुल ८३ वटा आवेदन मात्र प्राप्त भएको जनाए।