नेकपा (माओवादी केन्द्र)का अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’ले वर्तमान परिस्थिति जटिल रहेको ब्रिफिङ गरेका छन् । शुक्रबार पार्टी केन्द्रीय कार्यालयमा बसेको स्थायी कमिटी बैठकमा अहिलेको मुख्य कार्यभार शान्तिप्रक्रियालाई टुंग्याउनु रहेको बताएका छन् ।

“वर्तमान परिस्थिति तरलजस्तो भएको छ । जटिल र पेचिलो बन्दैछ । तर, हाम्रो अहिलेको मुख्य कार्यभार शान्तिप्रक्रियालाई टुंगोमा पुर्‍याउनुपर्छ भनेर घनीभूत छलफल भइरहेको छ,” प्रधानमन्त्रीको ब्रिफिङबारे प्रवक्ता अग्निप्रसाद सापकोटाले सुनाए ।

प्रचण्डले टीआरसी विधेयकबारे सत्तारुढ र प्रतिपक्षी दलसँग पटक–पटक छलफल भएको बताएका छन् । संसद्को यही अधिवेशनबाट पारित गर्नुपर्नेमा उनले जोड दिएका छन् ।

“सहमतिमा नै यो अधिवेशनमा हर हालतमा टीआरसी विधेयक पास गर्नुपर्छ भन्नेमा जोड दिनुभयो,” सापकोटाले भने । बैठकमा उनले विधान, केन्द्रीय समिति बैठक, विधान सम्मेलनका विषयमा संक्षिप्त ब्रिफिङ गरेका थिए ।

बैठकमा विधानबारे छलफल सुरु भएको छ । विधानमस्यौदा समितिको सुझावसहितका विषयमा छलफल भएको हो । छलफलमा कमिटीहरू भद्दा भएकाले चुस्त दुरुस्त बनाउनुपर्ने सुझाव आएको उनले बताए ।

केन्द्रीय समिति १५१ बनाउनुपर्ने प्रस्ताव उपाध्यक्ष पम्फा भुसाल नेतृत्वको समितिले दिएको थियो । स्थायी कमिटी बैठक शनिबार पनि बस्नेछ । यही माघ २८ र २९ गते केन्द्रीय कमिटी बैठक र फागुन १–३ विधान सम्मेलन हुनेछ ।

नेताहरुले पार्टीको विधानमा समाजवादी विचारधारा अभिव्यक्त हुनुपर्नेमा जोड दिएका छन्। शुक्रबार पार्टीको स्थायी कमिटी बैठकमा बोल्दै माओवादी केन्द्रका नेताहरुले संविधानमा नै समाजवाद उन्मुख राज्य व्यवस्थाको उल्लेख गरिएको भन्दै पार्टीको विधानमा पनि समाजवादी विचारधारा अभिव्यक्त हुनुपर्ने धारणा राखेका हुन्।

शुक्रबारको बैठकमा विधान मस्यौदा कार्यदलको संयोजक उपाध्यक्ष पम्फा भुसाल, महासचिव देव गुरुङ, उपमहासचिवहरु जनार्दन शर्मा, गिरिराजमणि पोखरेल र वर्षमान पुनले आफ्नो भनाइ राखेको सापकोटाले जानकारी दिए। बैठक शनिबार पनि पनि बस्नेछ।