इलाम–१ बाट नेकपा एकीकृत समाजवादीका वरिष्ठ नेता तथा पुर्व प्रधानमन्त्री झलनाथ खनालले धाँधली भएको भन्दै मतगणना बहिष्कार गरेका छन् ।  जारी मतगणनामा  खनाललाई पराजित गर्दै  नेकपा (एमाले)का उम्मेदवार महेश बस्नेत विजयी भएकाे परिणाम आएकाे छ ।  पूर्वप्रधानमन्त्री  खनाललाई हराउँदै एमाले जिल्ला कमिटी अध्यक्ष बस्नेत निर्वाचित भएका हुन् ।  बस्नेतले २५ हजार सात सय ५० मत प्राप्त गरेका छन् भने खनालले २३ हजार ८८ मत पाएको निर्वाचन अधिकृत राजकुमार दाहालले जानकारी दिएका छन् । तर यसबारे आधिकारिक घाेषणा भने भएको छैन । खनालले मत परिणाम बारे असन्तुष्टि व्यक्त गर्दै पुन मतगणनाकाे माग गरेका छन् । उनलेे भनेका छन्-  इलाम १ को गणनामा सुरुदेखि नै रहस्यमय र धाँधलीपूर्ण गतिविधि भए । मतगणना अधिकृतले एकैपटक विभिन्न पालिकाका ३२ वटा बाकस घोप्ट्याउन लगाएछन् । त्यो अवैज्ञानिक थियो । किन यसो गरेछन् भनेर मैले कारण खोजें । पाँच सय मत गायब पारेछन् ।  त्यसपछि यहाँभित्र अनियमितता छ भन्ने प्रष्ट भएपछि गन्ने प्रक्रियामा कमजोरी भएको थाहा भयो । मेथर्ड बेठिक छ, कर्मचारीमाथि पनि आशंका भो । सबै आँकडा ठिक हुँदाहुँदै पनि मत कसरी गायब भयो ? यसको जवाफ नपाउँदासम्म हामी गणनामा सहभागी हुँदैनौं भनेका हौं ।