काठमाडौं,१० जेठ ।

स्पेनिस किङ्स कप फुटबलको उपाधि बार्सीलोनाले जितेको छ । कोपा डेल रे समेत भनिने यो प्रतियोगिताको फाइनलमा सेभियालाई हराउँदै बार्सीलोनाले कीर्तिमानी २८ औं पटक उपाधि पक्का गरेको हो ।

आइतबार राति भएको खेलमा बार्सीलोना २-० ले विजयी भयो । खेलको ३६ औं मिनेटमा हेभियर मास्केरानो रातो कार्ड खाँदै मैदानबाट बाहिरिएपछि बार्सा १० जनामा समेटियो ।

निर्धारित ९० मिनेटको खेल गोलरहित बराबरीमा सकिएपछि थपिएको अतिरिक्त समयमा भने नाटकीय परिणाम आयो ।

सेभियाका एभर बानेगाले रातो कार्ड खाएपछि टोली १० जनामा समेटियो । यसैको फाईदा उठाउँदै बार्सीलोनाका योर्डी अल्बाले पहिलो गोल गरे ।

अतिरिक्त समयको अन्तिम मिनेटमा सेभियाका क्यारीको मार्टीन्सले पनि रातो कार्ड खाएपछि टोली ९ जनामा समेटियो ।

खेलमा केही सेकेण्ड मात्रै बाँकी छँदा बार्सीलोनाका नेयमारले एक गोल गरेपछि टोली २-० ले विजयी भएको हो ।

जितसँगै बार्सिलोनाले यो सिजन पनि ला लिगा र किङ्स कप गरी दुई वटा उपाधि जितेको छ । युरोपा लिग च्याम्पियन सेभियाको भने घरेलु उपाधि जित्ने सपना अधुरै रह्यो ।