काठमाडौं, २१ वैशाख  ।

खगोल वैज्ञानिकहरुका अनुसार पृथ्वी र सौर्यमण्डल जस्तै वातावरण भएका तीन ग्रह पत्ता लागेको छ । यी तीन ग्रहमा जीवनको सम्भावना हुन सक्ने उनीहरुको भनाई छ ।

३९ प्रकाशवर्षको दुरीमा रहेका यी तीन ग्रहको आकार पृथ्वी र शुक्र ग्रह समान छ । ‘नेचर जर्नल’ मा प्रकाशित शोधका अनुसार ती ग्रहमा जीवनका लागि उपयुक्त संकेत देखिएका छन् ।

बेल्जियमका शोधकर्ता माइकल गिलेनले भने, ‘यी ग्रह शुक्र, पृथ्वी र मंगलको स्तरमा छन्, यसको अर्थ ती ग्रहको सहतमा पानी तरल अवस्थामा हुन सक्छ र जीवनको सम्भावना पनि देखिएको छ ।’

उनका अनुसार यी ग्रह विद्यमान प्रविधिबाट आफ्नो वायुमण्डलीय बनावटको अध्ययनका लागि उपयुक्त छन् । यसको अर्थ ती ग्रहमा निर्वाध अध्ययन गर्न र त्यहाँ जीवनको सम्भावना खोज्न सकिने उनको भनाई छ ।

एएफपी समाचार एजेन्सीका अनुसार यस शोधमा संलग्न म्यासाचुसेट्स इन्स्टिच्यूट अफ टेक्नोलोजीका वैज्ञानिक जुलियन डे विटले भने, ‘यी ग्रह निकै नजिक छन्, यो खगोल विज्ञानका लागि चिट्ठाजस्तै हो ।’ (एजेन्सी)