काठमाडौं, १२ वैशाख ।

बार्सिलोनाले पछिल्लो खेलमा लुइस स्वारेजको उत्कृष्ट प्रदर्शनसँगै फराकिलो जित निकाल्दै स्प्यानिस ला लिगामा अग्रता कायमै राखेको छ । गएराती स्र्पोटिङ गिजोनलाइ ६–० को अन्तरले हराउँदै बार्साले अंक तालिकामा झिनो अग्रता कायमै राखेको हो । लिगमा ३ खेल मात्र बाँकी रहँदा बार्साले ८२ अंक जोडेको छ । ८२ अंकनै जोडेर पछ्याइरहेको एट्लेटिको मड्रिड गोल अन्तरका आधारमा मात्र दोस्रो स्थानमा छ । यस्तै रियल मड्रिड ८१ अंक सहित तेस्रो स्थानमा छ ।

गएराती बार्साको जितमा स्वारेजले ४ गोल गरे । बाँकी २ गोल लियोनल मेस्सी र नेयमारका नाममा रह्यो । यस्तै एट्लेटिको मड्रिडले मालागालाई १–० ले हराउँदै उपाधी होडमा दबाव कायमै राखेको छ । रियल मड्रिडले पहिलो हाफमा २–१ ले पछि परेको अबस्था उल्टाउँदै रायो भाल्कानोलाइ ३–२ ले पराजित गरेको छ । शिर्ष स्थानको बार्सा पछिल्ला तीन खेलमा जित विहिन भएपछि स्प्यानिस ला लिगामा उपाधी होड रोमाञ्चक बनेको हो ।