एजेन्सी, २ वैशाख २०७३ ।

उपाधि दाबेदार मानिदैं आएको बार्सिलोनालाई हराउँदै एथ्लेटिको मड्रिड युएफा च्याम्पियन्स लिग फुटबल प्रतियोगिताको सेमिफाइनलमा प्रवेश गरेको छ ।

गएराति आफ्नै मैदानमा भएको दोस्रो लेगको खेलमा एथ्लेटिको मड्रिडले बार्सिलोनालाई २–० ले पराजित गर्‍यो । एथ्लेटिकोलाई विजयी गराउन दुबै गोल एन्टोनियो ग्रेजम्यानले गरे ।
यसअघि पहिलो लेगको खेलमा बार्सिलोनासँग २-१ ले पराजित भएको एथ्लेटिकोले गएरातिको जितपछि समग्रमा खेल ३–२ ले आफ्नो पक्षमा पारेको हो ।

गएराति भएको अर्को खेलमा पोर्चुगलको बेनीफिकासँग २–२ गोलको बराबरी खेल्दै जर्मनीको बायर्न म्युनिख पनि सेमिफाईनलमा पुगेको छ । पहिलो लेगको खेलमा बेनीफिकालाई १–० ले हराएको बायर्न म्युनिखले दोस्रो लेगमा २-२ गोलको बराबरी भएपछि समग्रमा खेल ३÷२ ले आफ्नो पक्षमा पारेको हो ।

गएरातिका खेलपछि युएफा च्याम्पियन्स लिग फुटबल प्रतियोगिताका सेमिफाईनल पुग्ने चारवटै टोलीको टुंगो लागेको छ । यसपटक स्पेनका दुई टोली रियल मड्रिड र एथ्लेटिको मड्रिड, जर्मनीको बायर्न म्युनिख र इङ्ल्यान्डको म्यान्चेस्टर सिटी सेमिफाईनलमा पुगेका छन् । सेमिफाईनलको खेल तालिका शुक्रबार निकालिने भएको छ ।