संक्रमणकालीन न्याय सम्बन्धी विधेयकमा निरन्तर छलफल गरेर टुंगोमा पुग्न प्रमुख तीन राजनीतिक दलका प्रमुख तीन नेता सहमत भएका छन् ।

आइतबार प्रधानमन्त्री निवास बालुवाटारमा प्रधानमन्त्री पुष्पकमल दाहाल प्रचण्ड, प्रमुख विपक्षी दल नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवाबीच छलफल भएको थियो । छलफलमा नेपाली कांग्रेसका प्रमुख सचेतक रमेश लेखक पनि सहभागी थिए ।

लेखकका अनुसार सोमबार शीर्ष तीन नेताले आ आफ्नो दलबाट दुई/दुई जना नेता लिएर छलफलमा भाग लिनेछन् । ‘शीर्ष तीन नेताले तोकेका तीन नेताले सहमतिका लागि निर्णय लिने गरी तोक्ने कि भन्ने विषयमा समेत छलफल भएको थियो । तर, अन्तिममा सामूहिक छलफल गरेरै निष्कर्षमा पुग्नु राम्रो हुन्छ भन्नेमा पुगियो र सोमबार सामूहिक छलफल गर्ने तय भएको छ’, उनलेे भने ।