चर्चित डन विष्णु लामालाई गोली प्रहार गरेर प्रहरीले पक्राउ गरेको छ । महानगरीय प्रहरी वृत्त, बौद्धको टोलीसँग जम्काभेट भएपछि भाग्न खोज्दा प्रहरीले बौद्धमा गोली हानी लामालाई पक्राउ गरेको हो ।

महानगरीय प्रहरी वृत्त, बौद्धका डीएसपी रमेशबहादुर सिंहका अनुसार, विशेष सूचनाको आधारमा जम्भुडाँडा गएको टोलीले तामाङलाई भेटेको थियो । ‘उनी भाग्न खोजेपछि घुँडामुनि गोली हानेर नियन्त्रणमा लिइएको हो,’ उनले भने । गोली लागेर घाइते भएका लामाको वीर अस्पतालमा उपचार भइरहेको छ ।

लामामाथि २०७५ साल भदौमा मेडिकल कलेजका विद्यार्थीलाई खुकुरी प्रहार गरेर घाइते बनाएको, २०७३ सालमा सिन्धुपाल्चोकमा भएको विवादका क्रममा १७ महिने बालिकालाई चिर्पट हानेर हत्या गरेको अभियोग छ ।

लामाको समूहमाथि अपहरण तथा फिरौती असुलीमा संलग्न रहेको आरोप पनि लाग्दै आएको छ ।