‘अभिनेत्रीहरु जहिल्यै पनि जिरो साइजको हुनुपर्छ भन्ने मान्यता राख्दिन्। फिल्मको रोलअनुसार फिगरमा ध्यान दिने गरेको छु। मलाई चाहिएको बेला मेहेनत गरेर फिगर बनाउन लागिपर्छु,’ अभिनेत्री ऋचा भन्छिन्, ‘खाना प्रेमी भएकाले खाना बार्ने काम कहिल्यै गरेको छैन। आजकल नियमित योग र डान्स गर्छु। त्यसले मलाई स्वस्थ रहन सहयोग गरेको छ।’प्रायः केटीहरु मोटाउँदा उनीहरुको पाखुरा, गाला र पेटमा मासु बढ्ने हुँदा खानपिन र व्यायाममा अभिनेत्रीहरु सजक हुनपर्ने हुन्छ। अभिनेत्री केकी अधिकारीकाअनुसार आजकल उनी हल्का मोटाएकी छन्। त्यसैले अमेरिकाबाट फर्किएलगत्तै उनी चक्रमथस्थित निरमाया फिटनेस सेन्टरमा जुम्बा र योगको प्रशिक्षण लिइरहेकी छन्। ‘अमेरिका बसाँईमा जंक फुट धेरै भएजस्तो लागेर एकसातादेखि फिटनेस सेन्टरमा नियमित चार घन्टा बिताइरहेको हुन्छु,’ केकी भन्छिन्, ‘कुनै पनि अभिनेत्री जहिल्यै जिरो साइजको हुनुपर्छ भन्ने हुन्न्। फिल्मको चरित्रअनुसार काम गर्ने हुँदा स्वास्थ्य फिट हुनुपर्छ भन्नेमा विश्वास गर्छु।’
सुटिङको काम केही कम भएकाले झण्डै चार घण्टा नियमित उनी फिटनेस सेन्टरमा बिताउने गरेकी छन्। हाल ४७ केजीकी उनी दुई वर्षअघि मोटाउँदा भने ५२ केजी पुगेकी थिइन्। ‘अहिलेसम्म खाना बारेर फिगर बनाउन जोड दिएकी छैन्। बरु कम खाने र व्यायाम धेरै गर्ने गर्छु।’
हालः ‘अनागत’ फिल्मको सुटिङमा व्यस्त अभिनेत्री प्रियंका कार्की फिटनेस मन्त्रमा नियमित काडियो गर्ने गरेकी छन्। विगत तीन वर्षदेखि नियमित फिटनेस सेन्टर धाउन थालेकी उनी सुटिङ र खानपिनको रुटिन नमिल्दा केहीदिनदेखि घरमा व्यायाम गरिरहेकी छन्। ‘अभिनेत्रीमात्र होइन सबै जना स्वस्थ हुनुपर्छ। डाइटिङ गरेर तौल घटाउने कुरा मलाई मन पर्दैन्, ‘प्रियंका भन्छिन्, ‘फेरि सुटिङमा व्यस्त हुँदा खानपिनमा खासै ध्यान दिन पाइँदैन।’ विभिन्न शोहरुको कारण डान्स धेरै गर्ने हुँदा उनले व्यायाम कम भएको महसुस गर्न पाएकी छैनन्। फिटनेसको लागि उनले मासिक ६ हजार छुटाउने गरेकी छन्।
फिगर र लुक्सको कारण चर्चा पाएकी अभिनेत्री करिश्मा मानन्धर नियमित त्रिपुरेश्वरस्थित ज्यास्मिन फिटनेस सेन्टरमा दुई घन्टा बिताउने गरेकी छन्। सुरुको गोदावरीस्थित घर वरपर नियमित हिँड्ने गरेकी उनी फिगर बनाउने फिटनेस सेन्टर पुग्न थालेकी हुन्। ‘स्वस्थ हुन सबैको लागि राम्रो हो। फिगरको लागि फिटनेस सेन्टर पुगेर व्यायाम गर्नु कामप्रतिको बफादारिता होजस्तो लाग्छ,’ करिश्मा भन्छिन्, ‘अभिनेत्री भनेको पब्लिक फिगर हुन्। त्यसैले फिगरमा ध्यान दिनु जरुरी छ। फिटनेस पुगेर व्यायाम गर्दा अझ बढी फिगरमा ध्यान दिइन्छजस्तो लाग्छ।’
उनी फिगर सन्तुलनमा राख्न पेटभन्दा तलको भाग टाइट गर्न व्यायाम गर्छिन्। हालः ६० केजीकी उनी घरमा सत्नुअघि योगसमेत गर्छिन्। दिनभरको तनावबाट मुक्त हुन सुत्नुअघि २५ मिनेट योग गर्छु।’ फिल्म निर्देशनमा जुटेकी उनी वार्षिक फिटनेसको लागि ७० हजार खर्चिन्छिन्।
अभिनेत्री रेखा थापा आजभोलि केही मोटाएकी छन्। आफूलाई भाग्यमानी अभिनेत्री मान्ने उनी जिरो फिगर बनाउने चक्करमा कहिल्यै लागिनन्। ‘संसारभर फिल्म क्षेत्रमा सक्रिय अभिनेत्रीले जतिसुकै काम, दाम र नाम कमाए पनि जहिल्यै पनि भोकै हुन्छन्। नियमित तालिकाअनुसार खानुपर्ने हुँदा एक रोगीजस्तो गरेर बाँचिरहेका हुन्छन्, ‘उनले भनिन्, ‘मचाँहि यो मामलामा भाग्यमानी भएँ। दर्शकले मेरो फिगरभन्दा कामलाई मनपराइदिए।’
खानपिनकी सौखिन उनी फिटनेस सेन्टर बिरलै पुग्ने गरेकी छन्। ‘कहिलेकाँही फिल्मको भूमिकाअनुसार हल्का मोटाइयो भने तनाव हुन्छ। त्यसबेला चाँहि मेहेनत गरेर तौल घटाउँछु।’ हाल ५८ केजीकी उनी चार वर्षअघि ‘हिम्मतवाली’ फिल्मको दौरान मोटाएर ६८ केजी पुगेकी थिइन्। फिल्मको सुटिङ नभएको बेला खानपिन बढी हुने उनी बताउँछिन्। ‘म अहिलेसम्म नियमितरुपमा फिटनेस सेन्टर गएकी छैन। स्वस्थ रहनुपर्छ भन्ने मान्यता राख्छु। केही महिनादेखि मोटाएको महसुस गरिरहेको छु। त्यसैले केहीदिन जुम्बा वा योग कक्षा दिने तयार गरिरहेको छु।’
