म्याग्दी,२९ वैैशाख ।

जिल्लाको चिमखोलाका स्थानीयवासी जङ्गलमै बास बसेर पदमार्ग निर्माणमा जुटेका छन् । म्याग्दी र मुस्ताङलाई जोड्ने वैकल्पिक मार्गका रुपमा पहिचान गरिएको धौलागिरी आइसफल पदमार्गमा पूर्वाधार निर्माण गर्न चिमखोलावासी जुटेका हुन् । म्याग्दीका विभिन्न नौ गाविसको उच्च पहाडी र हिमाली भूभागलाई समेटेर मुस्ताङको लेते जोड्ने पदयात्राअन्तर्गत पदमार्ग निर्माणको काम भइरहेको छ ।

यो वर्ष पर्यटन मन्त्रालयबाट विनियोजन भएको रु १० लाख बजेटबाट पदयात्राले समेटिएको चिमखोलाको लेकमा पर्ने ससलधारादेखि धौलागिरि बेसक्याम्प क्षेत्रसम्मको पदमार्ग निर्माणको काम भइरहेको पदमार्ग निर्माण समितिका अध्यक्ष धुव्रकुमार पाइजाले बताउनुभयो । उहाँका अनुसार पदमार्ग निर्माणका लागि चिमखोलाका ४० जनाको टोली विगत एक महिनादेखि झन्डै तीन हजार मिटर उचाइको हिमाली क्षेत्रमा पदमार्ग निर्माणमा परिचालित छन् । उनीहरु जङ्गलकै ओडारमा बास बसेर पदमार्ग निर्माण गरिरहेका छन् ।

यो वर्ष जङ्गल, पहाड र भिरमा करिब तीन किलोमिटर नयाँ पदमार्ग निर्माण गर्ने योजना छ । पाँच वर्षअगाडि टान पोखराको नेतृत्वमा जिल्लाका सरोकारवालाको पहलमा गरिएको स्थलगत अवलोकनबाट पहिचान गरिएको यस पदमार्ग क्षेत्रमा तीन वर्षदेखि निरन्तर रुपमा पदमार्ग निर्माण अटूट रुपमा भइरहेको छ । टान पोखरा, जिविस म्याग्दी, पर्यटन मन्त्रालय र पर्यटन कार्यालय पोखराको आर्थिक सहयोगमा पदमार्ग निर्माण कार्य अगाडि बढेको हो ।

दहबुकीदेखि मुस्ताङको लेतेसम्म यस अगाडि नै सामान्य पदमार्ग सञ्चालनमै रहेको छ । बेनी–जोमसोम सडक सञ्जाल विस्तारसँगै विस्थापित बेनी–जोमसोम पदमार्गको वैकल्पिक रुटका रुपमा पहिचान गरिएको ‘धौलागिरी आइसफल पदमार्ग’ले म्याग्दीको पिप्ले, भगवती, बेगखोला, दग्नाम, दोबा, भुरुङ तातोपानी, दाना, चिमखोला र कुइनेमङ्गले गाविसलाई समेटेको छ । जंगलमा बसेरै धौलागिरी आइसफलको बाटो कोरिँदै !