काठमाडौै, ३० चैेत ।

पोखरा कप फुटबल प्रतियोगिताको पाँचौ संस्करण आजबाट पोखरामा सुरु हुँदैछ । प्रतियोगीताको उद्घाटन खेलमा आज विभागीय सशस्त्र प्रहरीको एपीएफ र नव जागृती क्लब सिमराबीच प्रतिस्पर्धा हुनेछ । खेल पोखरास्थित पोखरा रंगशालामा दिउँसो २ बजे सुरु हुनेछ । मनकामना केबलकारले प्रायोजन गरेको यो संस्करणको पहिलो खेलमा यसअघि नवजनजागृती युवा क्लवको नाममा खेल्दै आएको टोली नै पोखरा कपमा सिमरा–११को नामले खेल्न लागेको हो ।

यसपटक प्रतियोगितामा नेपालका ११ तथा भारतको एक टिमले सहभागिता जनाउँदैछन् । प्रतियोगितामा ए डिभिजनका चर्चित टोलीहरु मनाङ मर्स्याग्दी, थ्रिस्टार, त्रिभुवन आर्मी, नेपाल पुलीस, एपीएफ र सरस्वती क्लबले सहभागिता जनाएका छन् । यसैगरी मोफसलका टोलीहरु झापा–११, धरान फुटबल क्लव, रुपन्देही–११, सिमरा–११, भारतको दिल्ली युनाईटेड तथा आयोजक पोखरा–११ ले पनि प्रतियोगितामा भाग लिएका छन् ।

कास्की जिल्ला फुटबल संघले आयोजना गर्ने प्रतियोगिता पोखरा रंगशालामा हुनेछ ।

प्रतियोगीताको बिजेताले ५ लाख ५५ हजार ५ सय ५५ तथा उपबिजेताले २ लाख ५५ हजार ५ सय ५५ रुपैया प्राप्त गर्नेछ ।