लमजुङस्थित इलाका प्रहरी कार्यालय भोटेओडारमा कार्यरत प्रहरी सहायक हवल्दार अर्जुन गुरुङ मकवानपुरको हेटौँडामा मृत फेला परेका छन् । गोरखाको आरुघाट गाउँपालिका– ३, पोखरीटोल स्थायी घर भएका गुरुङ मंगलबार बिहान हेटौँडा उपमहानगरपालिका– ८, ओमनगरमा मृत फेला परेका हुन् ।

जिल्ला प्रहरी कार्यालय मकवानपुरका अनुसार ओमनगर गेटनजिक बिहान करिब ४ः३० बजे गुरुङ मृत अवस्थामा फेला परेका थिए । मर्निङवाकमा निस्किएका एक व्यक्तिले उनलाई देखेपछि इलाका प्रहरी कार्यालय पशुपतिनगरमा खबर गरेका थिए ।

प्रहरी सहायक हवल्दार गुरुङ लमजुङस्थित इलाका प्रहरी कार्यालय भोटेओडारमा कार्यरत रहे पनि उनको परिवार हेटौँडा– ८, कमानेमा कोठा लिएर बस्दै आएकाे थियाे । मकवानपुर प्रहरीका अनुसार उनी आफ्नो कोठाअगाडि बनाएको ट्रस्टको फलामको पाइपमा प्लास्टिकको डोरीले पासो लगाई झुन्डिएको अवस्थामा फेला परेका थिए ।

घटनास्थलमा सुसाइड नोटसमेत फेला परेको प्रहरीले जनाएको छ । उक्त नोटमा के उल्लेख छ भन्ने विषय भने प्रहरीले सार्वजनिक गरेको छैन । घटनाको कारण र परिस्थितिबारे थप अनुसन्धान भइरहेको मकवानपुर प्रहरीले जनाएको छ ।

प्रहरीले घटनास्थलको मुचुल्का तथा आवश्यक अनुसन्धान प्रक्रिया अघि बढाएको छ । मृतक गुरुङको शव पोस्टमार्टमका लागि हेटौँडा अस्पतालमा राखिएको छ ।