राष्ट्रपति निर्वाचन आगामी फागुन २५ गते  र उपराष्ट्रपतिकाे निर्वाचन चैत ३ गते हुने भएको छ ।

निर्वाचन आयोगले सोमबार पत्रकार सम्मेलन गरी आगामी फागुन २५ गते राष्ट्रपतिको निर्वाचन गर्ने घोषणा गरेको हाे ।  आयोगले राष्ट्रपति र उपराष्टपति निर्वाचनको मिति विज्ञप्तिमार्फत पनि जानकारी गराएको छ ।

निर्वाचन आयोगका प्रवक्ता शालिग्राम शर्मा पौडेलले फागुन २५ गते बिहीवार राष्ट्रपतिको निर्वाचन भएपछि उपराष्ट्रपति पदको निर्वाचन प्रक्रिया सुरु हुने बताए । उनले राष्ट्रपति र उपराष्ट्रपतिको निर्वाचन आयोगले सातै प्रदेशमा मतदान गर्ने गरी आवश्यक तयारी गर्ने प्रयास गरेपनि तत्काल सम्भव नदेखिएको भन्दै मतदान काठमाडौंमा नै हुने बताए ।