नेपाली कांग्रेसको केन्द्रीय कार्यसमितिको बैठकले प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल नेतृत्वको सरकारलाई विश्वासको मत दिने निर्णय गरेको छ । नयाँ बानेश्वरस्थित संघीय संसद् भवनमा बसेको केन्द्रीय कार्यसमितिको बैठकले सरकारमा सहभागी नहुने, तर प्रधानमन्त्री प्रचण्डलाई नेतृत्वको सरकारलाई विश्वासको मत दिने निर्णय गरेको हो ।

नेपाली कांग्रेसले समेत विश्वासको मत दिने भएपछि प्रधानमन्त्री प्रचण्ड सबैभन्दा वढि विश्वासको मत प्राप्त गर्ने प्रधानमन्त्री बन्ने निश्चित भएको छ । प्रचण्डलाई यस अघि १ सय ६९ जना सांसदको समर्थन रहेको थियो । अब नेपाली कांग्रेसको ८९ मत र नेकपा एकीकृत समाजवादीको १० जना र लोकतान्त्रिक समाजवादीको ३ सांसदको समर्थन प्रचण्डलाई प्राप्त हुने देखिएको छ । यसरी हेर्दा प्रचण्डलाई २ सय ७२ सांसदको विश्वासको मत प्रचण्डलाई प्राप्त हुनेछ । प्रचण्डलाई नेमकिपाको १ जना, राष्ट्रिय जनमोर्चाको १ जनाको समर्थन नआउने देखिएको छ ।

सरकारलाई कांग्रेसले पनि विश्वासको मत दिँदा प्रतिनिधिसभा प्रमुख प्रतिपक्षविहीन हुनेछ । सभापति देउवासहितका शीर्ष नेताहरू भविष्यमै सत्ता पुनरागमनको सम्भावना जीवित राख्न प्रधानमन्त्री दाहाललाई विश्वासको मत दिनुपर्ने पक्षमा उभिएका हुन् । उपसभापति धनराज गुरुङ, महामन्त्रीद्वय गगन थापा र विश्वप्रकाश शर्मासहितका अधिकांश नेता प्रतिपक्षमा बस्नुपर्ने अडानमा थिए ।