महोत्तरीको बर्दिवास-११ स्थित खयरमाराको पाँचे टोलबाट स्वतन्त्र उम्मेदवार विष्णुबहादुर योन्जन चडेको गाडीबाट प्रहरीले डेढ लाख नगद बरामद गरेको छ ।      शुक्रबार साँझ पाँचे टोलमा पुगेका योन्जनको गाडीबाट रकम फेला पारी बरामद गरिएको महोत्तरी प्रहरीले जनाएको छ । महोत्तरी क्षेत्र नं १ (२) का स्वतन्त्र उम्मेदवार योन्जनले आचारसंहिताविपरीत मतदातालाई प्रलोभनमा पार्ने हिसाबले पैसा बोकेर हिँडेको पाइएपछि डेढ लाख रकम बरामद गरिएको महोत्तरीका प्रहरी प्रमुख एसपी कृष्ण पंगेनीले जानकारी दिए ।

बा १४ च ८८७४ नम्बरको स्कर्पियोमा अन्य व्यक्तिहरुलाई लिएर हिँडेका योन्जनसहितका व्यक्तिलाई प्रहरीले शनिबार स्पष्टीकरण सोध्ने गरी छाडेको महोत्तरी क्षेत्र नं १ का निर्वाचन अधिकृत गुणराज श्रेष्ठले जानकारी दिए । शनिबार स्पष्टीकरण सोधिने र चित्तबुझ्दो जवाफ नआएमा २५ हजार रुपैयाँसम्म जरिवाना गर्न सकिने श्रेष्ठले बताए ।

पाँचे टोलका स्थानीयको घरमा गएर कुरा गर्दै मतदातालाई प्रलोभन पार्न प्रयास गरिरहेको सूचनाका आधारमा खानतलासी गर्दा स्वतन्त्र उम्मेदवार योन्जनबाट उक्त रकम फेला परेको जिल्ला प्रहरी कार्यालय महोत्तरीले जनाएको छ । याे खबर कान्तिपुरमा सुनिता बरालले लेखेकी छिन् ।