सिन्धुपाल्चोकको बाह्रबिसे नगरपालिका–७ का तीन स्थानमा गएको पहिरोमा परी बेपत्ता मध्ये ३ जनाको शव फेला परेको छ भने २८ जना अझै वेपत्ता रहेको प्रहरीले जानकारी दिएको छ ।

पहिरो गएको स्थानमा खोजी गर्दा नागपुजेकी ६५ वर्षीया भक्तिमाया श्रेष्ठ, भिरखर्कको विक टोलकी २३ वर्षीया जुनुमाया विक र नेवार टोलकी ६० वर्षीया सर्किनी नेवारको शव फेला परेको जिल्ला प्रहरी कार्यालय सिन्धुपाल्चोकका डिएसपी प्रकाश सापकोटाले जानकारी दिए ।

गएराति भारी वर्षासँगै गएको पहिरोले बाह्रबिसे नगरपालिका–७ मा पर्ने घुम्थाङको नागपुजे, भिरखर्क र नेवार टोलमा घरहरु पुरेको छ । डिएसपी सापकोटाका अनुसार हालसम्म ११ वटा घरमा क्षति पुगेको जानकारी प्राप्त भएको छ ।

घटनास्थलमा सभामुख अग्नीप्रसाद सापकोटाको टोल् पुगेको छ । उनी सडक मार्गबाटै घटनास्थल पुगेका हुन् ।

सिन्धुपाल्चोक बाह्रबिसेमा फेरि पहिराे : १८ घर पुरिए, धनजनको क्षति, सभामुख गाडीमा जाँदै