काठमाडौं, १७ वैशाख  ।

संयुक्त राष्ट्रसंघले द्वन्द्वग्रस्त सिरियाको अवस्था चिन्ताजनक भएको जनाएको छ ।

एलेप्पोस्थित विद्रोहीको नियन्त्रणमा रहेको अस्पताल लगायतका स्थानमा भएका आक्रमणपछि सिरियाको अवस्था नाजुक हालतमा पुगेको राष्ट्रसंघले जनाएको हो ।

पछिल्लो २४ घण्टामा सिरियामा भएका आक्रमणमा ६० जनाभन्दा बढीको मृत्यु भइसकेको छ । मेडिसिन्स् सान्स् फ्रन्टियर्स् (एमएसएफ) च्यारिटीको सहयोगमा सञ्चालित अस्पतालमा भएको हवाई आक्रमणमा चिकित्सक र बिरामीसहित कम्तिमा २७ जनाको मृत्यु भएको थियो । त्यस्तै अन्य हमलामा पनि ३० जनाभन्दा बढीको मृत्यु भएको छ ।

राष्ट्रसंघका प्रतिनिधिले सिरियामा मानवीय सहायता आवश्यक रहेको बताए ।

आक्रमणमा सिरियाली सरकार वा रुसी युद्धक विमानको संलग्नता रहेको आशंका गरिएको छ । सिरियामा आंशिक युद्धविराम भए पनि पछिल्लो समय हिंसाका घटनामा कमी आएका छैनन् । सिरियामा सन् २०११ यता शुरु भएको गृहयुद्धमा परी २ लाख ७० हजारभन्दा बढी मानिसको मृत्यु भइसकेको छ । (एजेन्सी)