एमालेको २७–२९ मंसिरमा हुने ११औं महाधिवेशनका प्रतिनिधि चयनका लागि सहमति हुन नसकेका २० जिल्लामा निर्वाचन भएको थियाे। तर मतदानमा ५० प्रतिशतभन्दा पनि कम संगठित सदस्य मात्र सहभागी भएका छन् ।

मधेशको धनुषा–२ मा १४ हजार संगठित सदस्य रहेकामा १ सय ६० मात्र मत खसेको छ । सुगम स्थल उपत्यकाको काठमाडौं र ललितपुरमा पनि ५० प्रतिशत भन्दा कम मत खसेको छ ।

लमजुङमा २५ प्रतिशत मात्रै मत खसेको थियाे । लमजुङमा एमालेको संगठित सदस्य ५ हजार ४ सय ७३ रहेकामा १ हजार ९ सय १६ मात्र मत खसेको थियो । खुलातर्फ १ हजार ६ सय ९३ र दलिततर्फ २ सय २३ मत खसेको थियो ।

तनहुँ–१ मा करिब ५० प्रतिशत तनहुँ–१ मा २ हजार ३५ मतदाता रहेकामा १ हजार एक ६६ मत खसेको छ । गोरखा–१ मा १ हजार २ सय संगठित सदस्य भए पनि ४ सय ९७ ले मात्र मतदान गरे ।

मकवानपुर–१ मा पनि एमाले महाधिवेशन प्रतिनिधि छान्न चुनाव भएको थियो । यहाँ ४ हजार १ सय ९ जना संगठित सदस्य मतदाता रहेकामा १ हजार ५ सय ४७ ले मतदान गरे ।

महोत्तरी–१ मा ६ हजार १० मतदाता रहेकामा ८ सय ९६ मात्र मत खसेको थियो । त्यस्तै क्षेत्र नम्बर ४ मा १२ हजार ८ सय ५२ सदस्यमध्ये ३ हजार ७ सय ७ ले मात्र मतदान गरेका थिए । सिरहा–१ मा ३ हजार २ सय सदस्यमध्ये १ हजार ५ सय ६२ जना मात्र मतदानमा सहभागी भए ।

ललितपुर–१ मा २ हजार ३ सय ६ संगठित सदस्यमध्ये १ हजार २ सय ८६ जनाले मात्र मतदान गरे । ललितपुर–२ मा १ हजार ५ सय ३८ सदस्य भए पनि ७ सय ६ जना मतदानमा सहभागी भए । ललितपुर–३ मा पनि संगठित सदस्यको सहभागिता आधाजसो मात्र रह्यो, १ हजार ३ सय ९८ सदस्य रहेकामा ७ सय २३ जनाले मात्र मतदान गरे ।

काठमाडौंमा निर्वाचन क्षेत्र–१० बाहेक अरूमा एमाले महाधिवेशन प्रतिनिधि छान्न चुनाव भयो ।

कर्णालीकाे रुकुम पश्चिममा मात्र एमाले महाधिवेशन प्रतिनिधि छान्न मतदान भएको थियो । रुकुम पश्चिममा संगठित सदस्य २ हजार ६५ भएकामा ३ सय ५४ जनाले मात्र मतदान गरेका थिए । यो १७ प्रतिशत मात्र सहभागिता हो ।