काठमाडौं, १६ चैत /

सोमबार आएको हावाहुरीका कारण घाइते भएकी एक महिलाको उपचारका क्रममा मृत्यु भएको छ ।

स्वयम्भू स्तुपा नजिकको घरको छतबाट इँटा खस्ने क्रममा भागदौड हुँदा नागार्जुन–४ सीतापाइला बस्ने कन्चनपुर, महेन्द्रनगरकी ३५ वर्षीया विमला मगर घाइते भई मनमोहन मेमोरियल अस्पताल स्वयम्भू लगिएकामा उपचारका क्रममा मृत्यु भएको हो ।

महानगरीय प्रहरी प्रभाग स्वयम्भूका प्रमुख प्रहरी नायब उपरीक्षक कोमल शाहले घाइते मगरलाई उपचारका लागि अस्पताल लगिएकामा गएराति उपचारका क्रममा मृत्यु भएको जानकारी दिए ।

मृतकको शव परीक्षणका लागि शिक्षण अस्पताल लगिएको छ ।

हावाहुरीका कारण काठमाडौंमा पाँचजना, भक्तपुरमा चारजना र ललितपुरमा दुईजना गरी ११ जना घाइते भएको प्रहरीले जनाएको छ ।