काठमाडौं महानगरपालिकाका मेयर बालेन्द्र शाह (बालेन) ले कार्यकाल बाँकी छँदै राजिनामा दिने भएका छन् । उनलेे  आगामी फागुन २१ गते हुने निर्वाचनमा झापा ५ बाट चुनाव लड्ने तयारी गरेका छन् ।

उनी त्यसको गृहकार्यमा रहेको उनको सचिवालयले जनाएको छ । झापा ५ नेकपा एमालेका अध्यक्ष केपी शर्मा ओलीले जितेको  निर्वाचन क्षेत्र हो । ओली सोही क्षेत्रबाट लगातार निर्वाचित हुँदै आएका छन् ।

त्यस क्षेत्रमा नेपाली कम्युनिस्ट पार्टीका तर्फबाट रञ्जित तामाङ लड्ने भएका छन् । तामाङ अखिल क्रान्तिकारीका पुर्व अध्यक्ष हुन् भने पार्टीका केन्द्रीय सदस्य हुन् ।

बालेन त्यही निर्वाचन क्षेत्रमा प्रतिष्पर्धा गर्ने तयारीमा रहेरै झापाका स्थानीय नेता कार्यकर्तासँग लगातार छलफलमा रहेको उनको सचिवालयले जानकारी दियो ।

आइतबार पनि बालेनले रास्वपा झापाका सभापति प्रकाश पाठकलगायतसँग छलफल गरेका थिए ।

आइतबार ललितपुरको ज्वागलस्थित आफ्ना सल्लाहकार कुमार ब्यञ्जनकारको घरमा अध्यक्ष पाठक, सचिव शम्भु सुस्केरासहितको टोलीसँग भेटवार्ता भएको बालेनका एक सल्लाहकारले बताए ।

“मेयरज्यू झापा–५ मा केपी ओलीसँगै चुनाव लड्ने तयारीमा हुनुहुन्छ । हाम्रो टिमले त्यहाँको मत सर्वेक्षण पनि गरिरहेको छ । त्यसैले आज पनि त्यहाँका नेताहरूसँग भेटघाट गरेर बुझ्नुभएको हो,” ती सल्लाहकारले भने ।
बालेनका प्रमुख स्वकीय सचिव भुपदेव शाहका अनुसार ५ गतेभित्र राजीनामा दिएर ६ गते मनोनयन दर्ताका लागि झापा जाने तयारी भएको छ ।