पछिल्लो भुकम्पले कति क्षति गर्यो सिन्धुपाल्चोकमा ? पछिल्लो भुकम्पले कति क्षति गर्यो सिन्धुपाल्चोकमा? मूलखबर संवाददाता काठमाडौं, १६ फागुन । भूकम्पले सिन्धुपाल्चोकका विभिन्न ठाउँमा क्षति भएको छ । अन्य जिल्लामा भने भौतिक क्षति नभएको सुरक्षा निकायले जानकारी दिएका छन् । सिन्धुपाल्चोकका सहायक प्रमुख जिल्ला अधिकारी गणेश नेपालीका अनुसार जिल्लाका विभिन्न क्षेत्रका भौतिक संरचनामा क्षति पुगेको छ ।. भोटेकोशी गाउँपालिका-३ भैरवकुण्डलाई केन्द्रबिन्दु बनाएर शुक्रबार विहान ६.१ म्याग्निच्युडको भूकम्प गएको थियो । भूकम्पका क्रममा आत्तिएर भाग्दा चौतारास्थित सिन्धुपाल्चोक कारागारमा रहेका भोटेकोशी गाउँपालिका–५ निवासी ३३ वर्षीय स्याङ्बो तामाङ लडेर घाइते भएका छन् सहायक प्रजिअ नेपालीका अनुसार तामाङको चौतारा अस्पतालमा उपचार भइरहेको छ । घाइते तामाङको स्वास्थ्य अवस्था सामान्य रहेको नेपालीले बताए ।. घाइते र क्षतिको विवरण. सिन्धुपाल्चोकको चौतारा साँगाचोकगढी नगरपालिका- ५ चौतारास्थित जिल्ला कारागारमा रहेका कैदीबन्दी भोटेकोशी गाउँपालिका- ५ बस्ने ३३ वर्षीय स्याङबो तामाङ डबलटेकर खाटबाट भाग्ने क्रममा लडेर हात मर्किएकाले उपचारका लागि जिल्ला अस्पताल चौतारामा भर्ना गरिएको छ । सिन्धुपाल्चोककै भोटेकोशी गाउँपालिका वडा नं-२ इलाका प्रहरी कार्यालय कोदारीको १ तल्ले जस्ताको छानो भएको ब्यारेकको पछाडि उत्तरतर्फ झ्यालमाथिको पर्खालमा करिब ८ फिट लामो भित्ताको भाग चर्किएको छ ।. सिन्धुपाल्चोककै भोटेकोशी गाउँपालिका वडा ३ तुसारेस्थित भीरमा सुख्खा पहिरो गएको छ । उक्त स्थानमा मानव बस्ती नभएकाले कुनै किसिमको क्षति नभएको छ । उक्त स्थानमा इलाका प्रहरी कार्यालय कोदारीबाट प्रहरी निरीक्षक सञ्जिता श्रेष्ठको कमाण्डमा ५ जनाको टोली खटिएको छ । उक्त स्थान सशस्त्र प्रहरी बल नेपाल बीओपी तातोपानीबाट करिब १३ किलोमिटर पश्चिम-दक्षिणमा अवस्थित छ।. सिन्धुपाल्चोकको मेलम्ची नगरपालिका- ११ कटुन्जे बस्ने ४३ वर्षीय रुपेश तामाङ भूकम्प आएपछि घरबाट निस्कने क्रममा चिप्लेर लडेका छन् । उनको टाउकोमा चोट लागी घाइते भई उपचारको लागि आफन्तले मेलम्ची नगर अस्पतालमा भर्ना गराएका छन् ।. सिन्धुपाल्चोकको लिसंखुपाखर गाउँपालिका- ४ तमखुबारी बस्ने सुमन गौतमको ढुङ्गामाटोले बनेको, जस्ताले छाएको, २ तले कच्ची घर भूकम्पका कारण करिब १०/१२ फिट भित्ता भाग चर्किएको छ । उक्त घरमा बस्न नमिल्ने भई नजिकै बुवा पदमबहादुर खत्रीको घरमा परिवार सरेका छन् । उक्त घरमा श्रीमती र २ वर्षीय छोरासहित ३ जना बस्दै आएका थिए ।. धादिङको गजुरी गाउँपालिका- १ स्थित इलाका प्रहरी कार्यालयमा कार्यरत प्रहरी जवान आकाश रेग्मी भाग्ने क्रममा ब्यारेक कोठाको भित्तामा ठोकिँदा नाकको हड्डी चर्किएको छ । भाग्ने क्रममा अगाडिका एउटा दाँत भाँच्चिएको छ । घाइते रेग्मीको अहिले गजुरी अस्पतालमा उपचारपछि डिस्चार्ज भएका छन् ।.