प्राधिकरणका कार्यकारी निर्देशक कुलमान घिसिङले बक्यौता नतिरेका उद्योगी तथा सञ्चालकका घरको समेत लाइन काटेर बक्यौता असुल गर्न पाउनुपर्ने भन्दै विद्युत् नियमन आयोगसँग सहमति मागेका छन् ।

डेडिकेटेड फिडर र ट्रंकलाइनबाट बिजुली लिएर प्रिमियम महसुल नतिर्ने ३४ उद्योगको खाता रोक्का गर्न, सेयर रोक्का गर्न र सेयर जारी गर्ने अनुमति रोक्का गर्न सम्बन्धित निकायलाई बुधबार पत्र समेत पठाएका छन् ।

बक्यौता नतिर्ने उद्योगको खाता रोक्का गर्न नेपाल राष्ट्र बैंकलाई, सेयर रोक्का गर्न कम्पनी रजिस्ट्रारको कार्यालय र सेयर जारी गर्न अनुमतिमा रोक लगाउन धितोपत्र बोर्डलाई अनुरोध गरिएको उनले प्रस्ट पारे ।

विद्युत् वितरण विनियमावली, ०७८ को विनियम ३१ को उपविनियम १ र उपविनियम ३ अनुसार बक्यौता महसुल असुलउपर गर्ने दायित्वअनुसार प्राधिकरणले बक्यौता महसुल नतिरेका संस्था वा कम्पनीका सञ्चालकका आवासको समेत लाइन काटी बक्यौता असुल गर्नुपर्ने व्यवस्थाबारे पनि आयोगलाई प्रस्ट्याएको छ ।