अरुणाचलका भूभाग समेटेर चीनले सार्वजनिक गर्यो नयाँ नक्सा
मूलखबर संवाददाता
काठमाडौं

१२ भदौ, काठमाडौं । भारतले दाबी गर्दै आएको अरुणाचल प्रदेशका केही भूभाग समेटेर चीनले नयाँ नक्सा सार्वजनिक गरेको छ । चीनको प्राकृतिक संशाधन मन्त्रालयले अरुणाचल र अक्साइ चीनलाई समेटेर नयाँ नक्सा सार्वजनिक गरेको हो ।

चिनियाँ कम्युनिस्ट पार्टीको मुखपत्र मानिने अंग्रेजी दैनिक ग्लोबल टाइम्सले उक्त नक्सालाई सन् २०२३ को ‘स्ट्याण्डर्ड’ नक्सा भनेको छ ।

चीन र भारतबीच लामो समयदेखि सीमा विवाद रहँदै आएको छ । विवादका कारण चीन र भारतका सैनिकबीच तनाव सिर्जना हुने गरेको छ ।

चीनको यो नक्सामा दक्षिणी चीन सागर, ताइवान पनि समेटिएका छन् ।

यसअघि अप्रिल २०२३ मा चीनको नागरिक मामला मन्त्रालयले अरुणाचल प्रदेशका ११ स्थानको नाम बदल्न अनुमति दिएको थियो । चीनले अरुणाचल प्रदेशको ९० हजार वर्गकिलोमिटर भूभाग आफ्नो भएको दाबी गर्दै आएको छ जबकि भारतले चीनले पश्चिमतर्फ अक्साई चीनको ३८ हजार वर्गकिलोमिटर भूभाग अवैध तरिकाले कब्जा गरेको आरोप लगाउने गरेको छ ।

अक्साई चीन पाकिस्तान, भारत र चीनको सीमा क्षेत्रसँग जोडिएको तिब्बती पठारको एक विवादित क्षेत्र हो । विगतमा यो क्षेत्र चीन–भारत जोड्ने सिल्क रोड थियो ।