आईसिसी एकदिवसीय क्रिकेट विश्वकप छनोटअन्तर्गत भएको दोस्रो खेलमा अमेरिकालाई ६ विकेटले पराजित गर्दै नेपाल विजयी भएको छ ।

मंगलबार जिम्बावेको राजधानी हरारेस्थित ताकासिंगा क्रिकेट क्लबमा नेपालले टस जितेर बलिङ रोजेपछि पहिले ब्याटिङ गरेको अमेरिकाले जितका लागि दिएको २०८ रनको लक्ष्य ४२.४ ओभरमा ४ विकेट गुमाउँदै नेपालले लक्ष्य पूरा गरेको हो ।

अमेरिकालाई हराउँदै विजयी बनेकाे नेपाली टिमलाई चाैतर्फी बधाई आएको छ । प्रधानमन्त्री पुष्पकमल दाहाल प्रचण्डले विजयी नेपाली टिमलाई बधाई दिनुभएको छ ।

नेपालका तर्फबाट भीम सार्कीले अर्धशतक पूरा गरे । उनले ७७ रन बनाएका थिए। यस्तै, दीपेन्द्रसिंह ऐरीले ३९ रन बनाउदा ओपनर कुशल भुर्तेलले पनि ३९ रन जोडेका थिए । आसिफ शेखले १२ रन बनाउदा कप्तान रोहित पौडेलले १६ रन बनाएका थिए ।

पहिले टस जितेर बलिङ गर्दा नेपालका लागि करण केसीले सर्वाधिक ४ विकेट लिएका थिए । यस्तै, गुलशन झाले तीन विकेट, दीपेन्द्रसिंह ऐरीले दुई र ललित राजवंशीले एक विकेट लिन सफल भएका थिए ।