भारतीय सेना प्रमुखले नेपाली सेनाको मानार्थ महारथीको दर्जा आज पाउने भएका छन्। पाँचदिने नेपाल भ्रमणका लागि काठमाडौंमा रहेका भारतीय सेना प्रमुख मनोज पाण्डेले मानार्थ महारथीको दर्ज्यानी चिह्न ग्रहण गर्ने छन् । अपराह्न ३ बजे शितल निवासमा राष्ट्रपति विद्यादेवी भण्डारीले नेपाली सेनाको मानार्थ महारथीको दर्ज्यानी चिह्न प्रदान गर्नेछिन् ।

नेपाल र भारतबीच सन् १९५१ देखि एकअर्का देशको सेना प्रमुखलाई मानार्थ महारथीको दर्जा प्रदान गर्ने प्रचलन रही आएको छ । तत्कालीन भारतीय सेनाध्यक्ष जनरल केएम करिअप्पाले नेपालमा आएर पहिलो पटक मानार्थ महारथीको सम्मान लिएका थिए भने पाण्डे भारतका १९ औं सेना प्रमुख रहेका छन् ।

पाण्डे आइतबार काठमाडौं आएका थिए । उनले आज सैनिक मञ्च टुँडिखेलस्थित वीर स्मारकमा श्रद्धाञ्जली अर्पण गर्नेछन् भने उनलाई नेपाली सेनाको मुख्यालय जंगीअड्डामा गार्ड अफ अनर दिने कार्यक्रम रहेको छ । साँझ जंगीअड्डामा पाण्डेको सम्मानमा रात्रिभोज कार्यक्रम राखिएको छ । मंगलबार सेना प्रमुख पाण्डेले सगरमाथा आधार शिविरको भ्रमण गर्ने कार्यतालिका छ ।