नेकपा माओवादी केन्द्रका अध्यक्ष पुष्पकमल दाहाल‘ प्रचण्ड’ पाँच दिने जापान भ्रमण सकाएर स्वदेश फर्किएका छन् । सचिवालयका ३ जना सदस्यसहित जापान गएका प्रचण्डले जापान भ्रमण फलदायी र सफल भएको बताएका छन् ।

त्रिभुवन विमानस्थलमा आयोजित पत्रकार भेटघाट कार्यक्रममा सम्वोधन गर्दै प्रचण्डले जापानबाट सिक्नुपर्ने कुरा धेरै भएको बताए । उनले कृषि र प्रविधिमा जापानले धेरै पग्ति गरेको बताउँदै जापान फोहोर व्यवस्थापनमा संसारमै अग्रस्थान रहेको पाएको बताएका छन् । उनले आफूले जापानमा कतै पनि फोहोर नदेखेको भन्दै जापानबाट फाहोर व्यवस्थापनमा धेरै कुरा सिक्नुपर्ने बताए ।

प्रचण्डले जापानले नेपालमा टनेल टेक्नोलोजीको विकासमा ठूलो सहयोग गर्न सक्ने बताए । उनले जापानमा आफ्नो स्वागत र सम्मानमा सबै नेपाली एकजुट भएको पाउँदा खुशी व्यत्त गरे । साथै नेपाली राजदूत, दुतावास र कर्मचारीहरुलाई पनि धन्यवाद दिए ।
‘जापानमा टनेल टेक्नोलोजी धेरैमाथि गएको छ । कम्युनिकेशन सहकार्यको कुरा भएको छ । जापान फोहोर व्यवस्थापनमा संसारकै अग्रस्थान रहेछ । कहीँकतै फोहोर गर्न नदिने रहेछ । त्यसैले हामीले फोहोर व्यवस्थापनका लागि तत्काल इक्विपमेन्ट चाहियो भन्यौ’ प्रचण्डले भने, ‘जापानको सहयोगमा नागढुंगामा सुरुङ बनिरहेको छ । अब हामी धेरै टनेलमा जान्छौ त्यसमा पनि जापानको प्रविधि र लगानी होस भन्ने छ ।’

यस्तै जापानको हाइड्रो, कृषि र भौतिक संरचना आवश्यकता भएको विषयमा छलफल भएको प्रचण्डले बताए । आगामी मंसिरमा हुने संसदीय चुनावमा जापानी पर्यवेक्षक आउने समेत उनले बताए ।

प्रचण्डले जापानमा रहँदा एटम बमले ध्वस्त जापानको हिरोशीमाको अवलोकन गरेका थिए भने नेशनल इन्स्टिच्युट अफ इन्फरमेशन एण्ड कम्युनिकेशन टेक्नोलोजीको भ्रमण गरेका थिए ।
प्रचण्डले जापानका सत्तारुढ दल लिवरल डेमोक्रेटिक पार्टी जापानका पुर्व महासचिव वरिष्ठ नेता तथा पुर्व मन्त्री तोसिहिरो निकाईसँग पनि भेटवार्ता भएको र उनीसँग नेपालको द्दिपक्षिय हित र सहकार्यको विषयमा गम्भीरतासाथ छलफल भएको बताए ।