नेकपाको विवाद केन्द्रबाट प्रदेश र जिल्लाहरुमा सर्दै गएको छ । जसको असर बागमती प्रदेश सरकारमा अभिव्यक्त भइसकेको छ ।

प्रधानमन्त्री समेत रहेका नेकपा अध्यक्ष के पी ओलीले प्रतिनिधिसभा विघटन गरी पार्टी समेत विभाजन गरेपछि बागमती प्रदेशका मुख्यमन्त्री डोरमणि पौडेलविरुद्ध अर्को पक्षले अविश्वासको प्रस्ताव दर्ता गराएको छ ।

नेकपा प्रचण्ड–माधव समूहका ४५ सांसदले प्रदेशसभामा अविश्वासको प्रस्ताव दर्ता गरेका हुन् । शालिकराम जम्मरकट्टेल प्रस्तावक र अरुण नेपाल समर्थक रहेको अविश्वासको प्रस्तावमा पौडेललाई पदमुक्त गरेर अष्टलक्ष्मी शाक्यलाई मुख्यमन्त्री बनाउन प्रस्ताव गरेका छन् ।

त्यसअघि सरकारमा रहेका तीन मन्त्रीले राजीनामा दिएका थिए । आन्तरिक मामिलामन्त्री शालिकराम जम्मरकट्टेल, उद्योगमन्त्री अरुण नेपाल र सामाजिक विकासमन्त्री युवराज दुलालले राजीनामा दिएका हुन् ।

बागमती प्रदेशसभा ११० सदस्यीय छ । सरकार सन्चालनका लागि ५६ सिट चाहिन्छ । नेकपाका सांसद मात्रै ८० जना छन् । तीमध्ये प्रचण्ड–माधव नेपाल पक्षीय सांसदको संख्या ४६ छ । केपी शर्मा ओली निकट सांसद ३४ जना छन् । कांग्रेस २२, विवेकशील साझा ३ र अन्य ५ जना सांसद बागमती प्रदेशमा छन् ।