विश्वव्यापी महमारीको रुपमा फैलिरहेको कोरोना संक्रमण रोकथाम तथा नियन्त्रणका लागि लागू गरेको लकडाउनलाई सरकारले १० दिन थप्ने निर्णय गरेको छ ।

आइतबार बसेको मन्त्रिपरिषद् बैठकले छिमेकी मुलुक र बढ्दो संक्रमणको अवस्थालाई मध्यनजर गरेर १० दिन लम्बाएको सरकारका प्रबक्ता तथा अर्थमन्त्री एवम् सुचना तथा प्रविधिमन्त्री युवराज खतिवडाले जानकारी दिए ।

यस अघि सरकारले घोषणा गरेको लकडाउनको समय भोली सोमबार सकिँदैछ । १० दिनको समय थप गर्दा २५ वैशाषसम्म लकडाउन जारी रहनेछ ।
लकडाउनका कारण देशका सम्पूर्ण यातायातका साधन, शैक्षिक संस्था, व्यापारिक प्रतिस्ठान, कल कारकाखाना र आर्थिक गतिविधि गत चैत ११ गतेदेखि ठप्प छन् । जनजीवन कष्टकर बन्दै गएको छ भने लकडाउनको ३३ औ दिसम्म आइपुग्दा राजधानी काठमाडौंबाट करिब २० लाख मानिसहरु आ आफ्ना घरतिर गइसकेका छन् ।
आजसम्म ५० हजार भन्दा वढिको कोरोना परिक्षण गर्दा ५२ जना संक्रमित पुष्टि भएका छन् भने ती मध्ये १४ जना उपचारपछि निको भएर घर फर्कीसकेका छन् ।

शनिवार कोरोना रोकथाम तथा नियन्त्रण उच्चस्तरीय समितिको बैठकले एक हप्ताका लागि लकडाउनको अवधि थप्ने  निर्णय गरेको थियो । लकडाउनले संक्रमण नियन्त्रणमा सहयोग पुर्‍याएको निष्कर्ष निकाल्दै परिस्थितिलाई मध्यनजर गरेर समयावधि थप गर्नु उच्चस्तरीय समितिले सिफारिस गरेको थियो ।