नेकपाका कार्यकारी अध्यक्ष पुष्पकमल दाहाल प्रचण्डले  भ्रष्टाचारीले उन्मुक्ति नपाउने बताएका छन् । सेक्युरिटी प्रिन्टिङ प्रेसमा कमिसनको बार्गेनिङ गरेका तत्कालीन सूचना तथा सञ्चारमन्त्री गोकुल बाँस्कोटाप्रति लक्षित गर्दै उनले घटनाको अनुसधन सुरु भइसकेको र दोषी पुष्टि भए सरकारले कुनै हालतमा छुट नदिने जनाए ।

कोही माथि अदालतमा मुद्दा छ, कसैलाई अख्तियारले छानविन गर्दै छ, उनले भने, ‘सरकार कुनै हालतमा पनि अनुसन्धान अघि बढाउन र कारबाहीको दायरामा ल्याउन कत्ति पनि पछि पर्दैन।’

शनिबार पूर्वी नवलपरासीको रजहरमा रहेको प्राकृतिक चिकित्सालयमा नयाँ भवनको उद्धघाटनपछि बोल्दै दाहालले त्यसो भनेका हुन्। उनले बाँस्कोटा घटनामा सरकारी अंगले अनुसन्धान अघि बढाइसकेको र केही समय धैर्य गरेर हेर्न आग्रह गरे।