आजदेखि नयाँ आर्थिक वर्ष २०७६/७७ सुरु भएको छ। नयाँ आर्थिक वर्षसंगै अब तलब लिन सरकारले प्यान कार्ड अनिवार्य लिनुपर्ने व्यवस्था गरेको छ। यो व्यवस्था बमोजिम अब कुनै प्राईभेट कम्पनी, संस्था, फर्म तथा निकायले स्थायी लेखा नम्बर (प्यान) बिना कुनैपनि व्यक्तिलाई तलब दिन पाउने छैन।

नयाँ आर्थिक वर्षसंगै प्यान कार्ड नभएका कर्मचारीको तलब प्राईभेट कम्पनी, फर्म तथा निकायले खर्चको रुपमा देखाउन पाउने छैनन्। सरकारले कुनै पनि कर्मचारीलाई तलब दिँदा बैङ्क खातामार्फत् तलब दिनुपर्ने भएकाले प्यान अनिवार्य भएको हो ।

प्यान कार्ड नलिएकाहरुले एक हजार रुपैयाँभन्दा माथिको तलब बैंकबाट लिनुपर्ने अनिवार्यता हुनेछ। एक हजारभन्दा कम लिँदा मात्र नगद कारोवार गर्न पाउनेछ।

अनलाइनबाटै यसरी लिन सकिन्छ प्यान नम्वर :

१. आन्तरिक राजस्व विभागको वेभसाइट www.ird.gov.np मा जानुहोस्।

२. होम पेजमा Taxpayer मा क्लिक गर्नुहोस् र Registration मा क्लिक गर्नुहोस्। त्यसपछि Application For Registration मा क्लिक गरी नाम थर भएको बक्समा आफ्नो नाम र थर लेखेर भर्नुहोस्।

३. User Name मा आफूले सम्झने नाम राख्नुहोस् अनि Password हाल्नुहोस् र फेरि अर्को बक्स Re password मा राख्नुहोस्। आफ्नो सम्पर्क नम्वर र Email ठेगाना राख्नुहोस्। कुन कार्यालयबाट प्यान नम्बर लिने हो सो ठेगाना IRO नम्बरमा खुलाउनुहोस्। त्यसपछि Ok बटनमा थिच्नुहोस्।

४. अब तपाइको व्यक्तिगत विवरण माग्छ। सोअनुसार आफ्नो सम्पूर्ण विवरण भर्नुहोस् र Submit गर्नुहोस्।

५. Submit भएपछि Print थिचेर त्यसलाई प्रिन्ट गर्नुहोस्।

६. उक्त प्रिन्ट कपि लिएर सम्बन्धित राजश्व कार्यालयमा जानुहोस्।

७. राजश्व कार्यालयले तपाईंलाई विवरण जाँच गरेर Pan कार्ड दिनेछ। यो सबै प्रक्रिया निशुल्क हो। प्यान कार्ड लिन कुनै शुल्क तिर्नु पर्दैन।