सरकारले भदौ १० को भोटेकोशी बाढी प्रभावितहरूलाई मासिक १५ हजार रुपैयाँका दरले राहत दिने भएको छ।

मन्त्रिपरिषदको बिहीबार बसेको बैठकले बाढीबाट रसुवा, नुवाकोट, धादिङ, गोरखा र चितवन गरी ७ हजार ५ सय ७० वटा निजी घरहरूमा क्षति पुगेकोले उनीहरूलाई आर्थिक सहायता दिने निर्णय गरेको हो।

‘चार जनासम्म भएको परिवारलाई मासिक १५ हजार रुपैयाँका दरले रकम दिने निर्णय भएको छ, परिवारमा ४ जनाभन्दा धेरै संख्या भए त्यसमा २ हजार थप गरेर दिइनेछ,’ मन्त्रिपरिषद बैठकका निर्णय जानकारी दिँदै एक मन्त्रीले सेतोपाटीसँग भने।

बाढीबाट ४८ वटा सार्वजनिक भवन, १८ वटा विद्यालय, ७ वटा स्वास्थ्य संस्था र ३० वटा सांस्कृतिक सम्पदामा क्षति पुगेको छ। यो क्षेत्रका लागि १ खर्ब ३ अर्ब ५४ करोड ९९ लाख रुपैयाँ बजेट आवश्यक छ।

सरकारले भोटेकोशी बाढी पीडितलाई दसैंअघि नै अस्थायी घर बनाउने तयारीसमेत गरेको छ।

रसुवाको भोटेकोशी नदीमा आएको विनाशकारी बाढीपश्चातको पुनर्निर्माणका लागि सरकारले ७ खर्ब २३ अर्ब ३१ करोड ५२ लाख रुपैयाँ आवश्यक पर्ने अनुमान पनि गरेको छ।