प्रमुख प्रतिपक्षी दल नेकपा (माओवादी केन्द्र)ले उपचुनावकाे समीक्षा गर्दै आगामी २०८४ सालको चुनाव पनि एक्लै लड्ने तयारीमा जुट्ने निर्णय गरेको छ ।

आज बिहान पार्टी अध्यक्ष पुष्पकमल दाहाल प्रचण्डको अध्यक्षतामा उनकै निवासमा बसेको पदाधिकारी बैठकले स्थानीय तह उपनिर्वाचनबाट शिक्षा लिँदै २०८४ सालमा हुने निर्वाचन पनि एक्लै लड्ने तयारीमा जुट्ने निर्णय गरेको हो ।

बैठकपछि पार्टी प्रवक्ता तथा उपाध्यक्ष अग्नी सापकोटाले बैठकले उपनिर्वाचनमा एक्लै लड्ने पार्टीको निर्णय जनताले अनुमोदन गरेको र माओवादीको जनमत सबैतिर ‘राम्रो’ भएको निष्कर्ष निकालेको बताए ।

उनका अनुसार सिंगो पार्टी अब एकल निर्वाचन भिड्ने तयारीमा लाग्नेछ र यसबारेमा ठाेस निर्णय स्थायी समिति र केन्द्रीय समिति बैठकले लिनेछ ।

सापकाेटाले देशैभर उपनिर्वाचनमा माओवादीकाे पक्षमा मत आएकाे, माेरङमा गाउँपालिका अध्यक्ष जितिएकाे, रूकुम पुर्व, जाजरकाेट र गाेरखामा सबै माओवादी विरूद्व लाग्दा पनि विजय हासिल भएकाे र  कीर्तिपुर नगरपालिकाको मेयर पदको उपनिर्वाचनमा माओवादी केन्द्रका उम्मेदवार दोस्रो भए पनि त्यसलाई पनि जितकै रुपमा लिएर उत्साहित भएको बताए ।

प्रवक्ता  सापकोटाले २०८४ को चुनावको एजेण्डा प्रत्यक्ष निर्वाचित राष्ट्रपति, पूर्णसमानुपातिक निर्वाचन र सांसदहरु मन्त्री नबन्ने गरी संविधानमा व्यवस्था गर्न माओवादी केन्द्रले पहल गर्ने समेत बताए ।

उनले अब सबै तयारी २०८४ को चुनाव जित्नका लागि’ गर्ने बताए । त्यसका लागि पार्टी अध्यक्ष प्रचण्ड नेतृत्वको सरकारले थालेको सुशासनको अभियानलाई जनतासम्म लैजाने, पालिका अधिवेशन र खबरदारी सभामा नेतृत्व केन्द्रित रहने उनले पत्रकारलाई जानकारी गराए।

पार्टीको केन्द्रीय समिति बैठक पुस २ गतेदेखि काठमाडौं आयाेजना गरिएको छ ।