प्रमुख प्रतिपक्षी दल नेकपा माओवादी केन्द्र आगामी मंसिर १६ को उपनिर्वाचनको लागि किर्तिपुर नगरपालिकाका उमेदवारहरु सार्वजनीक गरेको छ । किर्तिपुरको नगाउँमा आयोजित एक कार्यक्रमका बीच पार्टी अध्यक्ष तथा पुर्व प्रधानमनत्री पुष्पकमल दाहाल ‘प्रचण्ड’ले उमेदवारहरुको सार्वजनीक गरेका हुन् ।
प्रचण्डले उमेदवार र नेता कार्यकर्ताहरुलाई आत्मसमीक्षासहित उपनिर्वाचनमा होमिन निर्देशन दिएका छन्।

उम्मेदवारी घोषणा कार्यक्रमलाई सम्बोधन गर्दै उनले भने, ‘जनताले हामीबाट जे अपेक्षा गरेका थिए, त्यसलाई जस्ताको तस्तै पूरा गर्न सकेनौं। हामी बदलिन चाहन्छौं, अवसर दिनुहोस् भनेर जनताको बीचमा जानुहोस्। टोल–टोल र घरघरमा पुग्नुहोस्।’

कार्यक्रममा नेकपा माओवादी केन्द्रले कीर्तिपुरको प्रमुखका लागि प्रा.डा. शिवशरण महर्जन, वडा नम्बर १ को अध्यक्षका लागि अष्टमान महर्जन र वडा नम्बर ४ को अध्यक्षका लागि ईञ्जिनियर नारायण बिष्टलाई उम्मेदवार घोषणा गरिएको थियो।

कार्यक्रममा प्रचण्डले अन्य दलभन्दा माओवादी फरक शक्ति हो र सरकारमा भएकोमा बेला माओवादीले हरेकपटक रुपान्तरणकारी काम गरेको छ भने पछिल्लो समय सुशासन, सामाजिक न्याय र समृद्धिको पक्षमा माओवादीले थालेको अभियान ऐतिहासिक थियो भनेर जनताले बुझिसकेको बताएका थिए ।

‘माओवादी नेतृत्वको सरकारले के गर्दै थियो र पछिल्लो समय नयाँ सरकार किन बन्यो भन्ने पनि जनताले स्पष्टसँग बुझिसकेका छन्, त्यसैले जनता पुनः माओवादीलाई विश्वास गर्न तयार हुँदै गएका छन्’, प्रचण्डले भने, ‘अब मुख्य कुरा हामी आफै पुनः जनताको सेवामा लाग्ने प्रतिबद्धतासहित रुपान्तरण हुन आवश्यक छ।’

कीर्तिपुर वीरता र बिद्रोहको केन्द्र

प्रचण्डले कीर्तिपुर नगरपालिका इतिहासदेखि नै वीरता र बिद्रोहको केन्द्र भएको उल्लेख गर्दै  यहाँको इतिहास, वीरता र बिद्रोहको सम्मान गर्दै नयाँ समृद्धिको अभियान सञ्चालन गर्न आवश्यक रहेका बताए ।

यसपटकको उपनिर्वाचनमा यो नगरपालिकामा माओवादी केन्द्रको जीतको आधार बलियो बन्दै गएको पनि अध्यक्ष प्रचण्डले दाबी गरे। इमान्दार, सरल, पारदर्शी एवं भाषा संस्कृतिका संरक्षकको रुपमा मेयरका उम्मेदवार प्रा.डा. शिवशरण महर्जन स्थापित रहेको उनको भनाइ थियो।

‘सांस्कृतिक वैभव यहाँको पूँजी र पहिचान हो,’ प्रचण्डले भने, ‘त्यसलाई थप स्थापित गर्दै कीर्तिपुरलाई देशभरिकै नमूना सांस्कृतिक नगर बनाउन प्राज्ञिक व्यक्तित्व महर्जनले मात्रै सक्नुहुन्छ भन्ने यहाँका मतदाताले राम्रोसँग बुझ्दै गएका छन्, त्यसैले उहाँलको जीत निश्चित छ।’