अध्यक्ष प्रचण्डले नै खुलेर आफ्नो कुरा राख्न भन्नुभएकाे छ। ‘पदाधिकारीको बैठकले पुग्दैन भने स्थायी कमिटी र आवश्यकता पर्छ भने केन्द्रीय कमिटीको लामै बैठक चलाउने अध्यक्ष कमरेडले संकेत गरिसक्नुभएकाे छ, एक नेताले भने ।
बैठकमा पार्टीबाट विगतमा भएका कमजोरी, सरकारमा हुँदा गरेका राम्रा कामहरुको विवरण र नयाँ कार्यक्रमबारे पदाधिकारीहरुले विस्तृतमा कुरा राख्ने भनेरै पदाधिकारी बैठक लम्बिरहेको छ । जसले जति पनि समय लिने भन्ने छुट पाएकैले शुक्रबारबाट सुरु भएको पदाधिकारी बैठकमा आइतबारसम्म आधा पदाधिकारी मात्र बोलेका छन् ।
बैठकको पहिलो दिन शुक्रबार वरिष्ठ उपाध्यक्ष नारायणकाजी श्रेष्ठ, उपाध्यक्ष अग्नि सापकोटा, उपमहासचिव वर्षमान पुन, सचिवहरु चक्रपाणि खनाल, सुरेन्द्र कार्की र हितराज पाण्डेले बोलेका थिए । शनिबारको बैठकमा उपाध्यक्ष पम्फा भुसाल र उपमहासचिव शक्ति बस्नेतले विषय राखेका थिए ।
आइतबारको बैठकमा उपमहासचिव जनार्दन शर्मा र गिरिराजमणि पोखरेल, सचिवहरु गणेश शाह, हितमान शाक्य र कोषाध्यक्ष श्रीराम ढकालले छलफलमा भाग लिएका थिए । २२ पदाधिकारीमध्ये अझै ८ जनाले बोल्न बाँकी छ ।
