प्रतिनिधि सभा सदस्य उर्मिला माझी पाैडेलले भ्रष्टाचारीकाे मुख पनि नहेर्ने घाेषणा गरेका पुर्व प्रधानमन्त्री तथा एमाले नेता केपी ओलीले भ्रष्टचारीलाई कार्वाही नगरी संरक्षण गरेकाे बताएकी छिन् ।
संसदकाे मंगलबार बैठकमा सरकारकाे नीतिबारे धारणा राख्दै माओवादी केन्द्रकी सांसद माझीले भनिन् – `सम्माननीय सभामुख महोदय,
विगतमा भ्रष्टाचारीको मुख हेर्दिन भन्ने पुर्व प्रधानमन्त्रीले कति जना भ्रष्टाचारीलाई कार्वाही गर्नुभएको थियो, यति, ओम्नी, वाइड वडी, ७० करोड लगायतका काण्डमा सहभागि कसलाई कार्वाही गर्नुभएको थियो ?´
उनले सरकारले भ्रष्टाचारविरुद्ध शुरु गरेको क्रियात्मक अभियानले जनतामा आशाको संचार गराएको बताइन् । उनले सरकारलाई भ्रष्टाचारविरुद्धको अभियानमा साथ दिन सांसदहरूसँग आग्रह पनि गरिन् ।
उनले नीति कार्यक्रममा जनयुद्ध शव्द राखिनु स्वभाविक र विस्तृत शान्ति सम्झौताको मर्म अनुरुप भएको बताउँदै जनयुद्धको कारण नै परिवर्तन सम्भव भएको दावी गरिन् ।
उनले भनिन् – नीति कार्यक्रमको प्रस्तावनामा जनयुद्ध शव्द राखीएको प्रति म धन्यवाद दिन चाहन्छु । जनयुद्ध जसले नेपालको आजको सम्पूर्ण परिवर्तनको लागि जग निर्माण गर्यो । सबै खालको जातीय, क्षेत्रीय, लिंगीय उत्पीडनको विरुद्ध जनमत निर्माण गर्यो, ती उत्पीडनको अन्त्य गर्यो । यदि जनयुद्ध नभएको भए के अहिलेको नेपाल सम्भव थियो ? के जनयुद्ध नभएको भए गणतन्त्रको सपना सम्भव थियो ? गणतन्त्र नआएको भए के यति धेरै महिलाहरुको उपस्थिति यो संसदमा सम्भव थियो ? इतिहासलाई हेरौं गणतन्त्र आउनुपुर्व कति जना महिलाहरु संसदमा हुनुहुन्थ्यो ? अहिले संंसद सहित सबै स्थानिय तह लगायत सबै निकायहरुमा महिलाको सहभागिता हेरौ र तुलना गरौं । म एउटा माझी समुदायको छोरी यो संसदमा आउनु त्यही जनयुद्धको कारण सम्भव भएको हो । ´