सुदूरपश्चिम प्रदेशकाे सरकार विस्तार भएको छ । प्रदेश सरकारका मुख्यमन्त्री कमलबहादुर शाहले शनिबार प्रदेश सरकार विस्तार गर्दै ४ जना नयाँ मन्त्री थपेका हुन् ।

थपिएका मन्त्री नेकपा माओवादी केन्द्रबाट ३ जना र कांग्रेसबाट १ जना रहेका छन् । नवनियुक्त मन्त्रीहरुको शपथग्रहण पनि आजै सम्पन्न भएको छ । आज अपरान्ह प्रदेश प्रमुखको कार्यालयमा उनीहरुले पद तथा गोपनीयताको शपथ ग्रहण गरेका हुन् ।

थपिएका मन्त्रीहरुमा माओवादीबाट रमेश धामीले उद्योग, पर्यटन, वन तथा वातावरण मन्त्रीको, झपट साउदले सामाजिक विकास मन्त्रीको र समानुपातिक सांसद गीतादेवी मालले उद्योग, पर्यटन, वन तथा वातावरण राज्यमन्त्रीको जिम्मेवारी पाएका छन् । यस्तै कांग्रेसबाट पृथ्वीबहादुर सिंहले आन्तरिक मामिला तथा कानुन मन्त्रालयको जिम्मेवारी पाएका छन् ।

राज्यमन्त्री गीतादेवी माललाई मुख्यमन्त्री कमल बहादुर शाहले नै शपथग्रहण गराए भने अन्य मन्त्रीहरुलाई प्रदेश प्रमुख देवराज जोशीले शपथग्रहण गराए ।