सिन्धुपाल्चोकमा मंगलबार साँझ लार्के खोलाबाट सुरु भएको बाढीले मेलम्ची नदी तटीय क्षेत्रमा अथाह क्षती भएको छ । बाढीले बगाउँदा सात जनाको मृत्यु भएको छ भने दुइको शव फेला परेको छ । बाढीबाट मेलम्ची बजारका अधिकांश घरमा क्षति पुगेको छ । मंगलबार साँझबाट सुरु भएको बाढीले मेलम्ची –हेलम्बु र मेलम्ची तिपेनी दुबै सडक सञ्जाल सम्पर्क विच्छेद भएको छ ।

मेलम्चीबाट माथिल्लो क्षेत्र जोडिने सबै झोलुङ्गे र पक्की पुलहरु बाढीले बगाएको छ । हेलम्बु र पाँचपोखरी गाउँपालिका सडक सञ्जालवाट अलग भएका छन् । निर्माणाधीन रेडियो मेलम्चीको भवन सहित मेलम्ची बसपार्क क्षेत्र हजारौँ रोपनी खेतीयोग्य जमिन बगाएको छ । बिसौँ किलोमिटर मेलम्ची–तीम्वु करिडोरका सबै संरचना र खेतीयोग्य जमिन मंगलबारको बाढीले बगाएको छ । नेपाल प्रहरी, नेपाली सेना र शसस्त्र प्रहरीले उद्धारको काम गरिरहेको प्रमुख जिल्ला अधिकारी अरुण पोखरेलले जानकारि दिनुभयो ।

बाढीको कटानवाट सुरक्षित रहन घरको छतमा रहेका स्थानीयहरुको नेपाली सेनाको हेलिकप्टरबाट उद्धार सुरु भएको छ । घाईतेहरुको उद्धारकालागि नेपाली सेनाको हेलिकप्टर बाढीग्रस्त क्षेत्रमा पठाईएको र आवश्यक उद्धार र पुनःस्थापना बारे छलफल सुरु भएको मेलम्ची क्षेत्रका सांसद तथा स्वास्थ्य मन्त्री शेरबहादुर तामाङले जानकारी दिनुभयो ।
सुरक्षित मानिएको पर्यटकीय क्षेत्रमा आएको बाढीले अकल्पनीय क्षति भएको स्थानीयले बताएका छन् । हेलम्बु गाउँपालिकाको तीम्वु वजार, चालिसे, चनौटे, ग्याल्थुम र मेलम्ची नगरपालिकाको तालामाराङ, मेलम्ची वारका सयौँ घर बाढीले बगाएको छ ।
प्रहरीले भने क्षतिको यकिन तथ्यांक आइनसकेको बताएको छ । पाँचपोखरी थाङपाल गाँउपालिका वडा नं।३ लार्केमा गएको पहिरो १ घण्टासम्म खोला थुनियर फुटदा आएको बाढिले निकै ठूलो क्षति पुर्याइएको र क्षतिको अनुमान मात्र गर्न सकिएको गाउँपालिका अध्यक्ष टासी लामाले जानकारि दिनुभयो ।
तीम्बु बजारमा रहेको तिम्बु प्रहरी चौकी सहित वजारका सबै घर बगाएको ईलामा प्रहरी कार्यालय तीम्वुले जनाएको छ । यस्तै बाढिले मेलम्चीमा निर्माणधिन अबस्थामा रहेको सिटि पार्क बगाएको छ भने मेलम्चीमा रहेको आमाहेल्मो बसपार्कमा रहेका टहराहरु बगाएको छ ।

मंगलबार साँझ आएको बाढी र पहिरोमा परी सात जनाको मृत्यु भएको हो । मंगलबार साँझ मेलम्ची र हेलम्बुमा आएको बाढी–पहिरोले व्यापक क्षति पुर्याएको छ । हेलम्बुमा तीनवटा र मेलम्चीमा एउटा गरी चारवटा पुल बगेका छन् । सडकहरु पनि भत्किएकाले यातायात सम्पर्क विच्छेद भएको छ

हिंडेर जान सक्ने स्थिति नभएकाले नेपाली सेनाको हेलिकोप्टर र अन्य निजी हेलिकप्टरलाई परिचालन गर्ने तयारी भइरहेको प्रमुख जिल्ला अधिकारी पोखरेलले बताए ।

मेलम्चीमा पानीको बहाव नघटेको उनले बताए । त्यो बहाव वस्तीतिर पस्यो भने थप क्षति हुन सक्ने भएकाले सतर्कता अपनाइएको उनले बताए ।