नेकपा माओवादी केन्द्रका अध्यक्ष प्रचण्डले विद्युत  प्राधिकरणका कार्यकारी निर्देशक कुलमान घिसिङलाई हटाउने सरकारकाे निर्णय आपत्तिजनक र गलत भएको बताउनुभएको छ ।

सरकारले कुलमानलाई हटाएर हितेन्द्र शाक्यलाई नियुक्त गरेको निर्णय सार्वजनिक नगरिरहेकाे बेला  प्रचण्डले एक प्रेस नाेट जारी गर्दै साे निर्णय असत्य सावित हाेस् भन्नुभएको छ ।

उहाँको नाेटमा लेखिएको छ-

देशमा जनताले चरम लोडसेडिङको मार खेपिरहेका बेला एउटा उर्जा विज्ञका रुपमा मेरो नेतृत्वको सरकारले कुलमान घिसिङलाई विद्युत प्राधिकरणको कार्यकारी निर्देशकमा नियुक्त गरेको हो। हाम्रो नेतृत्वको सरकारको योजना अनि उहाँको विज्ञता र क्षमताबाट उज्यालो नेपाल निर्माण गर्न सफलता मिलेको जन–जनमा जानकारी छ। प्राधिकरणको बाकी बक्यौता जनताको पैसा हो उठाउनुपर्छ भनेकै कारणले कुलमान घिसिङलाई सरकारले लामो समयदेखि पदबाट हटाउने उद्देश्यका साथ पटक–पटक स्पष्टीकरण सोधेर अन्याय गर्दै आएको थियो । आज भने सरकारले मन्त्रीपरिषद् बैठकबाट उहाँलाई बर्खास्त नै गरेको भन्ने खबर संचारमाध्यमबाट सार्बजनिक भएको छ । आशा गरौं यो खबर असत्य सावित होस्, यदि सत्य रहेछ भने सरकारको यो कदम बिल्कुल गलत र आपत्तिजनक छ । दुई तिहाई बहुमतको दम्भमा गरिएको यो निर्णयप्रति घोर निन्दा गर्दै यसको प्रतिरोध गर्न आग्रह गर्दछु ।