लमजुङमा प्लाष्टिकजन्य फूल उत्पादन तथा विक्री वितरणमा प्रतिबन्ध. जिल्ला प्रशासन कार्यालय लमजुङले लमजुङमा प्लाष्टिकजन्य फूल उत्पादन तथा विक्री वितरणमा प्रतिबन्ध लगाएको छ ।. चाडबाडका बेला प्लाष्टिकजन्य फूलगुच्छाहरू भित्रने भन्दै प्रशासनले चाडबाडकै समयमा नागरिकलाई सचेत गराएको छ ।. वातावरण र स्वास्थ्यमा प्रत्यक्ष असर गर्ने भन्दै प्लाष्टिकजन्य फूलमालाको उत्पादन, विक्रिवितरण, ओसारपसार र उपभोगमा प्रतिबन्ध लगाएको प्रशासनले जनाएको छ ।. प्रमुख जिल्ला अधिकारी बुद्धबहादुर गुरुङले लमजुङका विभिन्न पालिकामा फूल खेती व्यवसायको रुपमा विकास हुने क्रममा रहेको र नेपाल समेत क्रमशः पुष्प व्यवसायमा आत्मनिर्भर हुँदै आएको सन्दर्भमा प्लाष्टिकजन्य वस्तुबाट निर्मित फूलमाला, खादा र अन्य सामग्रीको प्रयोग नगर्न सार्वजनिक सूचना जारी गरिएको बताए ।. सूचनामा सरकारकाे नीतिलाई सम्झाउँदै भनिएको छ- नेपाल सरकार, वन तथा वातावरण मन्त्रालयले वातावरण संरक्षण ऐन, २०७६ को दफा १६ को उपदफा (६) ले दिएको अधिकार प्रयोग गरी नेपालभर प्लाष्टिकजन्य फूलगुच्छाको उत्पादन, आयात, विक्री वितरण र भण्डारण गर्न पूर्ण रुपमा रोक लगाइएको व्यहोराको मिति २०७९ श्रावण १२ को नेपाल राजपत्रमा प्रकाशित सूचना समेत सबैमा अवगत छ ।. सहायक प्रमुख जिल्ला अधिकारी गोकर्णराज सुयलले वातावरण र स्वास्थ्यमा प्रत्यक्ष असर गर्ने प्लाष्टिकजन्य फूलमालाको उत्पादन, विक्रिवितरण, ओसारपसार र उपभोग गरेको पाइएमा प्रचलित कानुन बमोजिम कारबाही हुने बताए ।.