नेकपा एमालेका अध्यक्ष तथा पुर्व प्रधानमन्त्री केपी शर्मा ओलीले संविधानअनुसार धारा ७६(२) अनुसार बनेको सरकारले विश्वासको मत नपाएर सरकार ढलेमा स्वतः धारा ७६(३) अनुसार सरकार बन्ने तर्क गरेका छन् ।

ओलीकाे साे धारणा भएको भिडियो अहिले सामाजिक सञ्जालमा भाइरल बनेको छ ।

अघिल्लो पटक वर्तमान प्रधानमन्त्री पुष्पकमल दाहाल प्रचण्डले विश्वासको मत लिने अघिल्लो दिन पार्टी संसदीय दलको बैठकलाई सम्बोधन गर्दै ओलीले भनेका थिए- उहाँले भोलि प्रधानमन्त्रीमाथि विश्वासको मत छ भनेर माग्नु हुनेछ । उहाँमाथि हामीले विश्वास छैन भन्दा, भोलि यदि उहाँको प्रस्ताव असफल भयो भने ७६ (२) को मिलिजुली सरकारको च्याप्टर क्लोज हुन्छ र, असफल हुनेबित्तिक्कै राष्ट्रपतिले प्रमुख पार्टीको हिसाबले प्रधानमन्त्री नियुक्त गर्नुहुन्छ ।

त्यसरी बन्ने अल्पमतको सरकार दृष्टिकोण र संकल्पबिहीन हुने भएकाले त्यसलाई रोक्न पनि प्रधानमन्त्रीलाई विश्वासको मत दिनुपर्ने ओलीको तर्क थियो । त्यस्तो सरकार गठन हुन सक्ने  स्थितिलाई रोक्न पनि विश्वासको मत दिनुपर्ने भन्दै ओलीले आफ्ना सांसदहरुलाई निर्देशन गरेको भिडियो अहिले सामाजिक सञ्जालमा भाइरल छ ।

अहिले अब बन्ने सरकार कुन धाराबाट बन्ने भन्ने बहस भइरहेका बेला ओेलीकाे धारणा एउटा नजिर हुनसक्ने बताइएको छ । प्रधानमन्त्री तथा माओवादी अध्यक्ष पुष्पकमल दाहाल प्रचण्डलाई दिएको एमालेकाे समर्थन अप्रत्याशित रूपमा फिर्ता लिएपछि प्रधानमन्त्री प्रचण्डले असार २८ गते विश्वासको मत फेस गर्ने घाेषणा गरिसकेका छन् । प्रधानमन्त्री प्रचण्डलाई एमाले र कांग्रेसले विश्वासको मत नदिएमा उनको सरकार ढल्छ र नयाँ सरकारकाे लागि बाटाे खुल्छ ।

त्यसपछि बन्ने सरकार ओलीकाे नेतृत्वमा बनाउने सहमति कांग्रेस एमालेले गरेकाे भनिएको थियाे । तर संविधानकाे व्यवस्था अनुसार धारा ७६(३) मा जाँदा ओली प्रधानमन्त्री बन्न नसक्ने र ठूलो दलकाे नेताकाे हिसाबले कांग्रेस सभापति शेरबहादुर देउवा प्रधानमन्त्री बन्ने स्थिति आउनेछ ।