एकीकृत समाजवादीले सर्वसम्मत तवरले नेतृत्व चयन गरेको छ । राजधानी काठमाडौंमा जारी १० ओैं महाधिवेशनमा निर्वाचन हुने चर्चाका बीच अध्यक्षमा माधवकुमार नेपाल र महासचिवमा घनश्याम भुसाल सर्वसम्मत चयन भएका हुन् । त्यसैगरी  नयाँ विधानअनुसार सम्मानित नेतामा झलनाथ खनाल सर्वसम्मत भएका छन् ।

एमालेबाट २०७८ भदौमा अलग भएपछि पहिलो पटक भएको महाधिवेशनबाट मुख्य तीन पदमा पुरानै नेतृत्वले निरन्तरता पाएको हाे ।

उपाध्यक्ष, उपमहासचिव, सचिवसहित बाँकी १९ पदाधिकारी र केन्द्रीय सदस्य चयन भने शुक्रबार आज हुने जनाइएको छ ।

प्रतिनिधिहरूले केन्द्रीय कमिटीको आकार बढाउन माग गरेका छन् । अहिलेको २९९ सदस्यीय केन्द्रीय कमिटीमा धेरै युवा साथी छुट्ने भएकाले आकार बढाउनुपर्ने दबाब आएको केन्द्रीय सदस्य राजेन्द्र राईले बताए ।