पछिल्लो समय गौतम बुद्धको जन्मस्थल लुम्बिनीमा विदेशी कूटनीतिज्ञहरू धमाधम आउन सुरु गरेका छन्।

नेपालस्थित विदेशी नियोगका पदाधिकारी धमाधम लुम्बिनी आइरहेका छन् । गत शुक्रबारमात्रै नेपालका लागि अमेरिकी राजदूत डिन आर थम्पसनले लुम्बिनी भ्रमण गरेका छन्। केही दिनमै नेपालका लागि बेलायती राजदूत लुम्बिनी आउने योजना रहेको लुम्बिनी विकास कोषले जनाएको छ ।

चैत ८ र ९ गते विभिन्न १९ देशका गैरआवासीय राजदूत, विभिन्न देशका महावाणिज्यदूत र सरकारी अधिकारीहरू बुद्ध जन्मस्थल लुम्बिनीमै आएर बुद्ध, शान्ति र समृद्धिका लागि एकताबद्ध रहेको सन्देश दिएका थिए ।

कार्तिक १४ गते संयुक्त राष्ट्र सङ्घका महासचिव एन्टोनियो गुटेरेस बुद्ध जन्मस्थल लुम्बिनी आएका थिए । प्रधानमन्त्री पुष्पकमल दाहाल ‘प्रचण्ड’सँगै लुम्बिनी आएका गुटेरेसले अशोक स्तम्भ अगाडि पत्रकार सम्मेलन गर्दै विश्व शान्तिको कामना गरेका थिए । रुस र युक्रेनबिच युद्ध चलिरहेको बेला उनले शान्ति भूमि लुम्बिनीबाट गरेको आह्वानले विश्वव्यापी चर्चा पायो, जसले लुम्बिनीको महत्त्व थप दर्शाएको छ ।

लुम्बिनी विकास कोषका उपाध्यक्ष ल्हारक्याल लामाले लुम्बिनी आउने विदेशी राजदूत एवम् अन्य उच्च पदस्थ व्यक्तिलाई लुम्बिनीको विकास र संरक्षणका साथै भैरहवामा अन्तर्राष्ट्रिय उडानका लागि आग्रह गर्दै आएका छन् ।

लुम्बिनीमा विदेशी पर्यटक भित्र्याउन गौतम बुद्ध अन्तर्राष्ट्रिय विमानस्थल नियमित हुनुपर्ने भन्दै उपाध्यक्ष लामाले, चीन, भुटान र श्रीलङ्काजस्ता देशबाट सिधै अन्तर्राष्ट्रिय उडान गरेर बुद्ध धर्मावलम्बीलाई लुम्बिनी ल्याउन सकिने बताउँदै आएका छन् ।