जेम्स क्यामेरुन’ले निर्देशन गरेको हलिउड चलचित्र ‘टाइटानिक’ इतिहासकै प्रभावशाली चलचित्रमा पर्छ । त्यसबखतको सबैभन्दा ठूलो पानीजहाज ‘टाइटानिक’को दुर्घटनाको कथा वास्तविक थियो। फिल्मको प्रेम कथा भने काल्पनिक भएपनि निकै असरदार छ।

‘आर.एम.एस्. टाइटानिक’ नाम गरेको यो पानीजहाज लण्डन साउथह्याम्पटनबाट न्यूयोर्क जाँदै गर्दा सन् १९१२ अप्रील १५ को बिहान उत्तर एटलाण्टिक महासागरमा एक ठूलो बरफको ढिक्कासँग ठोक्किएर डुबेको थियो। उक्त दुर्घटनामा १५०० भन्दा बढी यात्रुहरूको मृत्यु भएको थियो।

अब ११२ वर्ष पछि फेरि इतिहास दोहोरिने भएको छ। सन् १९१२ मा डुबेको टाइटानिक जहाजको धर्तीमा फेरि टाइटानिक–२ निर्माण गर्ने तयारी भइरहेको छ।

अस्ट्रेलियाका अर्बपति तथा पूर्व सांसद क्लाइभ पाल्मरले यसलाई निर्माण गर्ने पूर्ण योजना बनाएका छन्। यसका लागि टेण्डर दिने काम पनि तिब्र गतिमा सुरु भएको छ।

सीएनएनका अनुसार क्लाइभले टाइटानिक-२ पहिलेको टाइटानिक भन्दा धेरै राम्रो हुने र यात्रुहरूले पूर्ण विलासिताका साथ यात्रा गर्ने मौका पाउने दाबी गरेका छन्।

विश्वको ७३२ औँ धनी व्यक्ति क्लाइभ पाल्मरले यसै साता सिड्नीमा पत्रकार सम्मेलन गरेर उक्त जानकारी दिएका हुन्। उनले टाइटानिक-२ बनाउने सपना अझै अधुरै रहेको बताए। अर्को वर्षको सुरुमा जहाज निर्माण सुरु गर्ने योजना छ।

टाइटानिक-२ जहाज परियोजना दुई पटक रद्द गरिएको छ। यद्यपि, क्लाइभले अब धेरै पैसाको साथ योजना पहिले भन्दा सुरक्षित र अधिक यथार्थवादी भएको विश्वास गरेका छन्।

टाइटानिक बनाउने कम्पनीको नाम व्हाइट स्टार लाइन थियो। सोही आधारमा क्लाइभले आफ्नो कम्पनीको नाम ब्लू स्टार लाइन राखेका छन्।
यो जहाज पहिलो टाइटानिक जस्तै तयार हुनेछ।

यसमा प्रसिद्ध सिँढीहरू, धुम्रपान कोठा, थिएटर, क्यासिनो, विभिन्न वर्गका मानिसहरूका लागि खानाको व्यवस्था पनि समावेश हुनेछ। यसमा तेस्रो दर्जाका मानिसका लागि क्याफेटेरिया पनि बनाइनेछ।

यो जहाज ८३३ फिट लामो र १०५ फिट चौडा हुनेछ। यो ९ डेक जहाजमा ८ सय ३५ क्याबिन हुनेछन् जसमा २ हजार ३ सय ४५ यात्रुले यात्रा गर्न सक्नेछन्।

जसमा प्रथम श्रेणीका लागि ३८३, द्वितीय श्रेणीका लागि २०१ र तृतीय श्रेणीका लागि २५१ कोठा तयार पारिनेछ। टाइटानिक-२ को पहिलो यात्रा जुन २०२७ मा निर्धारित गरिएको छ। र, यो इङ्गल्याण्ड देखि न्यूयोर्कसम्म चल्नेछ। टाइटानिक- २ मा यात्राको लागि टिकट मूल्यहरू घोषणा गरिएको छैन।

ठीक १११ वर्षपछि आइतबार (१८ जुन) देखि दुर्घटनाग्रस्त टाइटानिकको भग्नावशेष हेर्न गएका पाँच व्यक्ति बेपत्ता भएसँगै टाइटानिक पुनः चर्चामा आएको थियो । उनीहरू टाइटान नामक पनडुब्बीमा सवार भई यात्रामा निस्किएका थिए । कतिपयले यस घटनालाई ‘दोस्रो टाइटानिक’ पनि भनिरहेका छन् । यो यात्रामा धनाढ्यहरू सामेल थिए । त्यसैले पनि दोस्रो टाइटानिकलाई महत्त्वको साथमा हेरिएको हो ।