म्यान्चेस्टर सिटीका फरवार्ड एर्लिङ हाल्यान्ड यूईएफ वर्ष खेलाडी चुनिएका छन् ।

बिहीबार मोनाकोमा भएको कार्यक्रममा नर्वेका फरवार्ड हाल्यान्ड वर्षको उत्कृष्ट खेलाडी चुनिएका हुन् । हाल्यान्डले अर्जेन्टिनाका कप्तान लियोनल मेसी र आफ्नै टिमका सहकर्मी केभिन डी ब्रुयनालाई पछि पारे ।

हाल्यान्ड ‘मेन्स प्लेयर अफ दी इयर’ चुनिँदा अर्जेन्टिनी कप्तान लियोनल मेसीले दोस्रो र डी ब्रुयनाले तेस्रो स्थानमा चित्त बुझाए ।

हाल्यान्डले सिटीबाट गत सिजन च्याम्पियन्स लिग, प्रिमियर लिग र एफए कपको उपाधि जितेका थिए । गत सिजन सिटीले ‘ट्रेबल’ जित्दा हाल्यान्डले सबैखाले प्रतियोगितामा गरी कुल ५२ गोल गरेका थिए ।